L’andanciu nun acabó pero sí tán yá acabando les midíes de l’Estáu d’Alarma. El Gobiernu d’España dio anuncia de que diba encarrilar la situación en cuatro fases y, la perspeutiva que se dibuxa, ye la de que too debería tar acabao pa finales de mes. A ello súmase’l fechu de qu’Asturies ye una de les Comunidaes Autónomes nes que más controláu ta’l virus.
Por eso, los direutores de FormientuEnCasaFest, Diego Solís y Inaciu Galán, presentaron la que va ser la última fase del programa con munches conferencies. Entama güei 4 de Mayu Esther García con un recetal lliterariu. Mañana 5 ye’l momentu de la conferencia “El cántabru: situación y perspectives del asturllionés en Cantabria” que va dar Daniel Lobete. El día 6 de Mayu Xosé Fernández Estrada dará otra conferencia col nome de “La mayoría del fútbol” y el día 7, Rafa R. Valdés va falar de Corvera Lliteraria; mientres que’l vienres 8 va ser la presentación del nuevu discu del grupu de Punk Rock Misiva que sacaron va poco en Youtube y podéis ver equí. La fin de selmana nesta ocasión nun tien programación doble. El sábadu llega Tiégui Alves dende Miranda L Douro “L’Asturllionés en Portugal: la mio esperiencia col mirandés”y el domingu va ser la conferencia de Xurde Menéndez Caravia “Divulgación científica n’asturianu: claves pal futuru”.
La semana que vien entámala Andrea Joglar el llunes 11 de Mayu nun alcuentru cola artista que va siguilu’l 12 de Mayu Xosé Ambás y Ramsés Ilesies pa falar de música. De rap n’Asturies más concretamente va falar Diego Castañón. El Xueves 14 de Mayu tóca-y a Pablo Quiroga que mos falará de guión nel cine y el vienres falará Illán Escalada del futuru de la música asturiana. El sábadu acaba Alma Hidalgo con un recital poéticu y el domingu los direutores del festival van facer valoración del mesmu.
Con esta “Cuarta fola”, el festival FormientuEnCasaFest convirtióse nel festival dixital más duraderu d’esta cuarentena y na programación n’asturianu más duradera. Y una cosa ta clara: ¡Vamos echalo de menos!
