Cyberpunk ye munches coses: Un xuegu de rol, un videoxuegu de moda (Cyberpunk 2077) y otru más vieyu de plataformes (Cyberpunk: Arasaka’s plot). El casu ye qu’agora, amás de too eso, Cyberpunk convirtióse nun anime de Netflix. La obra en cuestión trátase de Cyberpunk: Edgerunners. Ye un spin off de Cyberpunk: 2077 (el videoxuegu) y aborda personaxes estremaos de los que lu protagonicen. La hestoria céntrase en David Martínez, un estudiande probe y brillante na academia d’Arasaka. Ye fíu de Gloria Martínez, una técnica sanitaria que trabaya n’ambulancies y que dobla turnos pa poder pagalo too: el pisu, la vida en Night City y la propia academia d’Arasaka.

Traición, venganza y omnipotencia de les corporaciones

Les coses tuércense bien ceo cuando una engarrada ente bandes pilla pel mediu a los Martínez y acaba col coche d’ellos esgonciáu y la madre muerta. A partir d’ehí, David ha face-y frente a una situación complicada no económico que ye, nun universu como’l de Cyberpunk onde l’estáu ye mínimu y la proteición social siempre de pago, muncho peor que les que podamos facer frente na realidá. Ensin demasiaes opciones, David axúntase con “males” compañíes y forma parte d’un grupu de “cyber punks”; esto ye, xente que se cambia’l cuerpu per aciu de modificaciones de hardware y software que potencien los sentíos, los músculos, la resistencia o la velocidá. Gracies a estos implantes (y al consumu d’inmunodepresores qu’ha facer siempre) van faciendo encargos pa clientes privaos nos qu’han recurrir a la violencia.

La serie presenta personaxes bien construyíos anque, polo xeneral, de vida curtia. Munchos de los collacios de David acaben “mal” y tienen hestories propies bastante dures. La traición, la venganza y la omnipotencia de les megacorporaciones (Militech y la propia Arasaka) son les exes fundamentales de la narración.

Fiel al videoxuegu

Nel planu estéticu llama muncho l’atención pa bien el tipu de dibuxu y la llinia. N’ocasiones más qu’un anime acabamos teniendo la impresión de tar énte un cómic d’una gran espresividá. D’otra banda, al tar CD PROJECT (la compañía que desendolcó’l videoxuegu) implicada, vemos cómo l’adautación pa col videxuegu ye práuticamente total: dende los soníos qu’hai cuando hai una llamada a los propios llugares qu’apaecen nel videoxuegu como’l famosu club Afterlife. La serie tien, quiciabes, la pega de que nun se desendolquen tolo que mos prestaríen los demás personaxes amás d’un paralelismu col videoxuegu y ye un final que nun se puede calificar de “feliz”. En tou casu, una serie que paga la pena ver.

Leave a Reply

La to direición de corréu nun va espublizase. Los campos riquíos márquense con *