Criéme naquella época na que nos escomenzaba a llegar anime a camionaos, con Dragon Ball, Los Caballeros del Zodiaco, Lupin, Sailor Moon, Las aventuras de Fly, Oliver y Benji o Bola de Dan. Y mientres los padres los criticaben por sangronientos, por gochos, por inmorales, los rapazos millenials víemos nellos valores que papamos, hestories que falaben sobre l’honor, l’amistá, la llealtá… Bono, tamién había de lo otro, magar la tisoria que-yos metíen davezu les canales, anque la verdá que pa nós eso facíalos más atrayibles.
Ún de los animes que meyor recuerdo, nun sé si porque lu echaben más o, a cencielles, porque me prestaba, yera’l que con una sinvergonzonería d’otru mundu llamaron en castellanu Chicho Terremoto. Nél, un rapaz bastante nanu convertíase na estrella del equipu de baloncestu del institutu, en parte gracies al talentu innatu que tenía, y en parte polos métodos tan raros qu’emplegaba. Y llueu taba, por supuestu, una riestra enorme de chistes de bragues, porque Chicho yera un dexeneráu qu’andaba llevantando faldes d’una manera que, visto anguaño, nun resultaba nada alleicionador pa los espectadores de la mio edá. Y lo más seguro ye que tampoco nun se viera mui bien daquella.
El recuerdu de la serie, al empar divertida y políticamente incorreutísima, emburrióme a mercar la edición nueva en castellanu que ta sacando Kimmo Editorial, nesta colos nomes orixinales de los personaxes, y non los qu’inventaben pa la serie bastante al bon tuntún. ¿Qué atopé nella? Bono, lo primero y evidente ye que nun tamos énte un spokon más del montón (esto ye, un soxéneru de manga sobre competiciones deportives col trabayu n’equipu como exa principal). Nestos suelen destacar les virtúes de los protagonistes, que siempre busque ganar llimpio nun exerciciu de compañerismu y autosuperación. En Dash Kappei, pela cueta, tenemos un protagonista que ye un piescu, gochu, individualista, vengativu, chupón, que ta dispuestu a facer tolo que se-y ocurra pa ganar. Y ye que lo que busca l’autor, Rokuda Nobodu, ye sobre manera que nos divirtamos col humor absurdu y incorreutu que lo envuelve too, y masque la competición y el deprendimientu de Kappei ocupen un gran espaciu de la hestoria, son más bien una sida pa desendolcar la so personalidá y metelu en situaciones absurdes. Bono, tovía nun llegué a esa parte, pero albidro que nun tomu de más p’alantre pue dir deprendiendo a trabayar n’equipu. O non, vete saber.
El casu ye que tamos énte un manga clásicu y pa mio idea imprescindible, pos marcó un estilu d’humor nel manga y tamién a una xeneración d’equí que, años dempués de salir en Xapón, contemplemos ablucaos como nos poníen esta serie primero de dir a la escuela. ¿Podéis creyer que nun soi a lleer los bocadillos de Kappei ensin sentir na cabeza la voz de Chicho?
