La San Diego Comic-Con tuvo asoleyando abondes novedaes estos díes, y una d’elles, tocántenes a dos proyeutos d’animación de DC, nun ta libre de polémica. Ye llamadero, ye lo primero qu’hemos dicir, que les dos tán basaes en cómics de la mesma dómina (1985-86 y 1986-87), la que munchos consideren la meyor de la compaña. Amás, les dos son adaptaciones de les que fácilmente pueden ser les hestories más populares de la so historia. Estes son, ensin allarganos más y pidiendo perdón pol teatrismu, Watchmen y Crisis on Infinite Earths.
La primera ye, de xuru, la más polémica. Y ye qu’esta serie de doce númberos que cambió la hestoria del cómic foi creada por Alan Moore y Dave Gibbons, y ye bien sabío qu’el primeru nun ta nada contentu conque la sobreesploten con películes, series, precueles y secueles. Va munchos años que Moore critica les hestories de superhéroes y la falta d’orixinalidá nelles, masque nun pue facer nada no tocante a Watchmen porque los drechos de los personaxes creaos pa les dos grandes (Marvel y DC) son siempre de les compañes. Dizse que-y ufrieron da-y los drechos si roblaba facer una segunda parte, pero ta claro qu’en DC yá sabíen cuála diba ser la respuesta. Hasta hai bromes col so cabréu nun episodiu de The Simpsons, y un popular vidéu en YouTube (equí) que yá parodiaba la sobreesplotación con una serie de dibuxos a lo Hanna-Barbera.
La otra película, l’adautación del crossover más importante na historia de DC, va titulase Justice League: Crisis on Infinite Earths, y ye que, anque na saga orixinal el supergrupu nun tenía un especial protagonismu, sí los personaxes de la so formación más habitual… Y, claro, pone-y el nome delantre pue indicar a despistaos los superhéroes protagonistes. La saga tien una importancia tremenda nos cómics, pos hasta entós, pa resumir a los non iniciaos, había dos grandes tierres paraleles onde asocedíen los acontecimientos de les sos hestories: Tierra-Ún, llar de la Lliga de la Xusticia y llugar habitual de les aventures narraes nos cómics dende finales de los años cincuenta, y Tierra-Dos, llar de la Sociedá de la Xusticia y onde vivíen les versiones orixinales d’heroes creaos nos años trenta y cuarenta, como podíen ser Superman, Batman o Wonder Woman (nesa bastante avieyaos). La saga enfrentábalos a una entidá cósmica que destruyía universos, y acabó por dar un mundu únicu y simplificar les cronoloxíes, dando llugar a una continuidá de “tiempu esnidiosu” más asemeyada a la de Marvel. Nun sabemos si esto va significar, tamién, un reiniciu na continuidá de les películes d’animación, pues estes lleven tamién cierta continuidá y sedría un bon momentu pa, al empar que nes películes d’aición real cola llegada de James Gunn, da-yos un enfoque nuevu.
Les dos películes van estrenase en 2024.
