L’AsturCON, Convención de Fantasía Asturiana, convoca una rueda de prensa a las 12:00 del vienres 2 d’avientu en Llaboral Centru d’Arte y Creación Industrial, onde va presentar la convención de fantasía made in Asturies que se va realizar el 17 del mesmu mes. Dexámosvos darréu cola información presentada:
La fantasía, la ciencia ficción, l’horror y el rol manden n’Asturies. Son los reis, vamos. Yá seya con una espada máxica, yá seya con un cañón de pulsos o un viaxe intraplanetariu, los fans de lo fantástico nun piden permisu, nin perdón. Agora somos el carneru la llueca. Y facémoslo en castellanu o n’asturianu, porque nun somos mundos distintos y nun tenemos mieu a atopar una bona hestoria seya na llingua que seya.
El 17 d’avientu, dende les 12 de la mañana, va tener llugar l’AsturCON, la I Convención de Fantasía Asturiana, na sala d’esposiciones de Llaboral Centru d’Arte y Creación Industrial.
Vamos contar con cinco meses redondes nes que van participar dalgunos de los/es meyores autores y editoriales del xéneru fantásticu d’Asturies, yá seya de ñacimientu o porque pacen per esti rinconín que ye la Tierrina. Esto ye, nun nos da más que ñacieres en Salamanca o vivas en Cuenca. Si vives equí o ñacisti equí. Si escribes n’asturianu o en castellanu. Si yes un yankee afincáu per estos llugares o yes de la xeneración Alsa y tuvisti d’emigrar a Madrid. Asturianos/es somos aquellos/es que vivimos, trabayamos o esfrutamos d’Asturies.
Tamién vamos organizar el primer Speed-dating del Principáu ente escritores y editoriales de xéneru fantásticu. Como nes pelis americanes, vamos dar cinco minutos a cada escritor/a que quiera propone-y una hestoria a una de les editoriales participantes. ¿Condiciones? Que s’apunten al acontecimientu al traviés de la páxina web y el so manuscritu seya de xéneru fantásticu (fantasía medieval, ciencia ficción, distopíes, horror, etc.)
Nel acontecimientu tamién vamos poder visitar la esposición inmersiva El mundu ye viesca, de Rotor Studio (aforu máximu 30 persones). El títulu de la obra ta inspiráu pol llibru The Word for World is Forest, d’Ursula K. Le Guin, una escritora que revolucionó la ciencia ficción per aciu d’un hibridamientu lliterariu con otros campos del conocimientu como l’antropoloxía, el feminismu o la ecoloxía.
Pero nun va ser lo único. N’AsturCON sabemos que somos pequeños, pero tenemos aires de grandones. Por eso somos ASTURIANOS/ES. Na convención va anunciase la creación del Premiu Fontenebrosa a la meyor obra de fantasía asoleyada n’Asturies. El nome, un homenaxe a la obra de Vicente García Oliva, el primer escritor n’asturianu de fantasía infantil y xuvenil. Nesta edición vamos conceder el Premiu Cero y va entregáse-y al propiu García Oliva.
Pa terminar, a lo llargo de tola convención vamos tener un puestu nel que vender los llibros de los autores y editoriales participantes nel atriu de Llaboral Centru d’Arte y Creación Industrial, nel marcu de LABshop Iviernu 2022, un acontecimientu que dende avientu de 2008 axunta un abondosu grupu de creadores, diseñadores y editores independientes nel prestixosu centru d’arte.
Autores confirmaos:
Helena Seoane, Ana Pereira, Dam Fernández, Nicolás Bardio, Adrián Carbayales, Xon de la Campa, Rudy Martínez, Felicidad Martínez, José Manuel Uría, Yosune Álvarez, Blanca Fernández, Andrés Fernández, Tiberio, Moisés Colunga, Dani Sierra, Vicente García Oliva, Alex Sebastián, Kai C. Torel, Abel Martínez, Lorena Miranda y otros nomes qu’entá tamos a la espera de confirmar
Editoriales confirmaes:
Radagast, Sportula, HT Publisher, Orpheus Ediciones Clandestinas, Trabe.
Títulos de les meses:
El Lego de la maxa
Los sistemes de maxa son los lladriyos colos qu’un autor construye una novela fantástica. ¿Cómo funcionen? ¿Qué tipos esisten? ¿Cómo aplicalos ensin alloriar y calteniendo’l sentíu de la narración? ¿Por qué manca tanto pisar una pieza de Lego?
Mitoloxía cuántica
La mitoloxía asturiana bebe de tradiciones milenaries, xuncíes y al empar distintes a les d’otros pueblos europeos qu’anguaño son la base de la ciencia ficción y la fantasía anglosaxona. ¿Pue un nuberu ser un primu hermanu de un Istari? ¿Dispón la güestia d’un portal fabricáu en Raticulín para venir a esti mundu dende’l más allá?
La fábrica d’héroes
Trés autores, trés tipos de personaxes y cómo los construyeron. Dende’l saltiáu uvieín de Drácula, pasando per un nigromante que nun quier destruyir el mundu, o una revisión del camín del héroe.
Especies diverses
En plenu alderique sobre la inclusión -¡gracies, Buzz Lightyear!– la ciencia ficción y la fantasía tán enllenos d’exemplos d’inclusión y diversidá. Xavier va en siella ruedes, Daredevil ye ciegu, les amazones salven el mundu y Black Panther enseñónos lo que ye Wakanda. Y sí, nos dibuxos animaos salen pareyes de lesbianes con fíos y nun nos traumaticemos.
El círculu máxicu del rol
De novela a xuegu de rol hai un pasu. O dos. O los que queramos (tira’l dadu, si lo prefieres). Pero la fantasía y la ciencia ficción tienen un rollín apetecederu pal rol. ¿Puen retroalimentase p’ameyorar dambos? ¿El círculu viciosu del bien ye dable? ¿Préstate antroxate y nun sabes qué sida poner?
Visita a la exposición “El mundu ye viesca”
Vamos contar con una visita guiada a la instalación inmersiva El mundu ye viesca, de Rotor Studio. Aforu d’hasta trenta personas.
Esta esposición convida a somorguiase nun mundu fantásticu inspiráu poles viesques asturianes y por un bioma desconocíu d’otru planeta. El títulu de la obra inspírase nel llibru “The Word for World is Forest” d’Ursula K. Le Guin, una escritora que revolucionó la ciencia ficción per aciu d’un hibridamientu lliterariu con otros campos del conocimientu como la antropoloxía, el feminismu o la ecoloxía.
