Como yá pasó enantes coles películes, nos últimos años ta de moda trayer series de vuelta, yá seya como continuaciones (Masters of the Universe, Veronica Mars, Sex and the City) o con versiones nueves (Kung Fu, Walker Texas Ranger, Sabrina). Hasta tenemos unes cuantes películes qu’acaben de pasar al formatu serie, como Chucky o Blindspotting. Los resultaos tán siendo, como ye normal, irregulares, apaeciendo coses bien interesantes y otres que… bono, digamos que non tanto.
Nun tenía munches esperances na torna de Dexter, el míticu asesín en serie, xusticieru y al empar forense pa la policía de Miami. La serie orixinal punxo un fitu na historia la televisión al facer protagonista un sicópata que yera a cayenos simpáticu, en parte gracies a que tamién nos narraba, solo a nós, los pensamientos más escuros que se-y pasaben pela cabeza. Tengo claro que series como la esitosa You nun esistiría (o sedría bien diferente) de nun ser por esta. Por embargu, la final foi (siendo amable) bastante regulera, arriendes de que’l llinguaxe de les series tien cambiao enforma, conque yo pensaba que diben tener de decidir ente caltener l’espíritu yá avieyáu de la orixinal o que perdiera la esencia que la facía especial. Menos mal que nun eché la llingua a pacer enantes de tiempu.
Permitíime revelar un pequeñu detalle del primer episodiu de New Blood, y ye que había daqué que me molestaba una barbaridá. Y ye que nun-y oyemos la voz. El personaxe lleva años ensin matar, perdíu nun pueblucu metá la nada y faciendo les coses que fai la xente normal. Trabaya nuna tienda. Tien moza y una vida sexual que paez más intensa de lo que nunca nun lo foi. ¿Perdió l’instintu asesín? ¿Ye a embazalu? ¿Lleva años disimulando o consiguió facese a la vida nueva? QUIERO SABER QUÉ PIENSES, REDIÓS. Cuanto más vía, más nerviosu me ponía, porque la voz yera un elementu de la serie orixinal al que nun taba dispuestu a arrenunciar. Y asina siguí, un bon ratu, bullindiegu en sofá. Pero entós, por fin, llega la sangre, y con ella, y tolo qu’esta significa, espierta la voz. Y nesa yá tevi claro que la vuelta diba pagar la pena.
Si queréis saber un poco más de qué vais atopar, vamos dicir que’l títulu nun ta por tar, sinón que la trama principal va ser el realcuentru col fíu que tuviera na serie orixinal. ¿Pue ser bon padre un asesín? ¿Pue’l fíu perdonalu por abandonalu? ¿Cuánto tienen los dos en común? Poques gracies, a lo llargo la serie vamos tener asesinatos, un sicópata con menos principios, policíes siguiendo los nicios que lleven a Dexter y cualesquier cosa que te prestara de la serie orixinal, pero con esta trama en centru y alteriándolo too.
Si resulta que yes de los pocos que nun saben nada del personaxe, y nun te peta ver la serie de 2006, pa mio idea tampoco nun te tien de dar mieu probar a ver esta. Siempre pues facer como otros personaxes del repartu y dir descubriendo, adulces, quién ye daveres Dexter Morgan.
