Diego Solís (Xixón 1991) ye ún de los poetes más destacaos de la última xeneración d’escritores asturianos. Ganador del Asturias Joven de Poesía en 2018, tien escrito tanto n’asturianu como en castellán y asoleyaos bien de poemarios como Hágase abril (Ruleta rusa), Cállanos con esa música (Impronta) o Y El mundu marcha (Saltadera). Amás, co-dirixó’l programa La cla invisible de Play Presta xunto con Laura Marcos. Amás, co-dirixe Formientu y fundó Fame Poétika, grupu col qu’organizó bien de timbes poétiques. Agora ta metíu nuna campaña de Crowdfunding pa editar “Volvemos en seis minutos” que podéis ver y sofitar equí; un proyeutu qu’axunta “poesía, imaxe y soníu”.

Organizasti timbes poétiques va unos años, anguaño’l nuevu poemariu ufierta la posibilidá de sentir los versos nos llabios del autor con namás escaniar un códigu QR: ¿Paezse dalgo la poesía de 2022 a la de va unes décades?

N’asturianu rescampló na performance y la poesía visual de Nel Amaro, agora tenemos a Pablo X. Suárez que nel so últimu llibru fai una poesía mui oral, a la que pon voz cola so propuesta d’El Velcro. Tamién Francisco Priegue fixo recitales onde tenía muncho pesu la mena de recitar con cierta performance. De les propuestes más recientes y nesa llínia de les timbes, ta amás Alma Hidalgo. Sicasí na nuestra poesía última (del 2000 p’aca mesmo) nun ye lo más habitual y óptase xeneralmente por una poesía más al usu que nun ta pensada pa una llectura concreta en públicu per parte del poeta. Polo xeneral la llírica asturiana de les últimes décades tiende a una llínia nidia y al versu llibre.

“l’oxetivu ye sacar un llibru cuidáu y que preste tener, un llibru diferente y frescu, que faga disfrutar de la poesía en distintos formatos”

En cuantes a los formatos d’edicion, en xeneral, innóvase poco na poesía asturiana. Tolo más axuntando ilustración o fotografía. Nesi sen puede dicise que ‘Volvemos en 6 minutos’ ye abondo singular y nes nueses lletres sobremanera. Toi grabando los poemes nun estudiu, faciendo videos que van acompañar esi audio… amás toi pendiente de tolos procesos del llibru, de la edición a la promoción y demás onde tienen muncha importancia les ilustraciones de la diseñadora Inés H. Ta siendo un trabayu descomonáu, pero l’oxetivu ye sacar un llibru cuidáu y que preste tener, un llibru diferente y frescu, que faga disfrutar de la poesía en distintos formatos.

Una de les coses que dices nel crowdfunding ye qu’hai una voluntá de “sacar la poesía del testu”. ¿Qué entiendes exautamente por ello?

Una de les mios esmoliciones foi siempre buscar canales distintos pa que llegue la lliteratura a la xente, especialmente a xente que nun ye la que tien más vezu llector. En varios proyectos nos que participé tuvo presente esa idea. Nesti casu, anque a nivel individual, sigo con esi enfotu, con un llibru al que pueda accedese de distintes menes y onde puede sentíseme recitar, onde cada poema lleva un vidiu propiu, qu’usa les sos ilustraciones y poemes en camisetes, coxinos…ye facer de la poesía una referencia más cola que convivir como se convive cola publicidá mesmo.

¿Qué va atopar el llector en “Volvemos en 6 minutos”?

Trátase d’una representación d’un suxetu que dende’l so sillón accede a too un universu dende les sos pantalles, cola publicidá y tolo qu’ello implica como telón de fondu, d’ehí el títulu. El llibru ta plantegao como un zapping y cada estaya del poemariu ye una canal de T.V, una plataforma, una aplicación…ente les qu’esi receptor pasa mientres consume y se consume al traviés de la publicidá y les ficciones que nos arrodien. Creo que’l llector o llectora va identificase pues pongo delantre un universu del que toos formamos parte, un universu abondo insatisfactoriu y distópicu.

“Creo que’l llector o llectora va identificase pues pongo delantre un universu del que toos formamos parte, un universu abondo insatisfactoriu y distópicu”

Una de les exes poles qu’apuestes nel poemariu ye la “cultura pop”. ¿Predominó siempre un ciertu elitismu nes lletres asturianes qu’agora ta resquebrando?

El mio poemariu ye mui pop por munches razones, pero pa según quién esto tamién puede ser elitista por contradictorio que paeza. Les referencies a veces faen conectar y otres desconectar: nesti llibru ye referencia tanto Fernán Coronas como la película Billy Elliot, tanto un eslogan de supemercáu que nos pasa inalvertíu como canciones de toa triba. Xuego cola idea de lo efímero, del consumu rápidu…anque, como se verá, dando-y una vuelta. Yo más que ‘resquebrar’ ná, trato d’escribir aquello qu’a min me prestaría lleer, d’ufrir al mundu les mios perspectives.

“trato d’escribir aquello qu’a min me prestaría lleer, d’ufrir al mundu les mios perspectives”

Na lliteratura asturiana les sovenciones tuvieron munchu pesu pero paez que cada vez tienen menos y qu’hai más proyeutos qu’opten por otres víes como la del crowdfunding. ¿Qué pienses del crowdfunding como ferramienta, cómo ta siendo l’acoyida?

L’acoyida foi perbona, algamose l’oxetivu faltando más de 15 díes pa pesllar el plazu. En sigo mesmo’l crowdfunding ye una manera de dir dando a conocer un proyectu. Ye una forma de financiación que nel mundu la música ye más habitual, por exemplu. Ye cierto que van surdiendo más iniciatives privaes o alternatives que tenemos de celebrar, pero les sovenciones y premios na lliteratura asturiana siguen teniendo un pesu importante.

¿Cómo ves el presente y el futuru de la poesía n’asturianu?

El presente lo tamos viendo y disfrutando. Hai abondo y, amás, bono, pues los y les qu’entamaron a espublizar nos 80 o 90 siguen espublizando coses brutales, más los que los siguieron llueu que son pa min una referencia directa (como se ve nesti y otros llibros míos)…y los de la mio quinta que tovía tenemos muncho que dicir. Yo veo futuru pero hai de sofitar a la xente mozo (y non ta mozo pero inédito entá), da-y espacios y oportunidaes pa que siga sumándose xente nuevo.

“Yo veo futuru pero hai de sofitar a la xente mozo (y non ta mozo pero inédito entá), da-y espacios y oportunidaes pa que siga sumándose xente nuevo.”

Semeya: Alfonso Palacio Estrada

¿Y la lliteratura en xeneral?

Pesie a too, la lliteratura asturiana resiste. Nós tamos equí pa crear belleza, pa siguir recitando y construyendo histories. La lliteratura va quedar cuando toos marchemos y sabráse que ‘tuviemos equí falando d’amor, falando de ti’ como escribiera Andrés Solar nel so día.

Leave a Reply

La to direición de corréu nun va espublizase. Los campos riquíos márquense con *