Song of the South ye una película yá medio escaecida, pero ye qu’hai una razón de pesu pa que Disney quiera que nun se recuerde más. Y ye qu’esta obra, qu’entemez aición real y animación, y llegó a ganar un Oscar pola banda sonora, yá en 1946, cuando s’estrenó, foi bien polémica. Y ye que, anque trata l’amistá ente un rapacín blancu y un paisanu negru, cosa que nun paez mala de mano, acusáronla de tar tremada d’estereotipos racistes y una dulcificación de la situación racial nel sieglu XIX.
Yá tien llovío dende entós y, por si la película nun fora yá problemática nel so tiempu, nun ye qu’avieyara perbién. Asina que Disneyworld Florida peslló en 2020 l’atraición basada na película, Splash Mountain, y anunció que diba reformala pa convertila nuna atraición nueva dedicada a The Princess and the Frog, la so primer película con una “princesa” afroamericana. Y agora, al retomar los desfiles Magic Happens en pasando l’andanciu, Disney acaba borrar d’esti un cachín que sonaba del cantar de la película Zip-a-Dee-Do-Dah, pa poner en cuenta d’él un cachu d’una de Peter Pan. Arriendes d’esto, y por supuestu, nun hai manera de ver en televisión la película, nin siquiera na canal de streaming Disney + ente tol catálogu que tien de los sos clásicos.
Hai quien xustifica esti borráu por ser una película racista, pero tamién quien considera que ye alteriar la historia del cine, facer un feu a los actores afroamericanos que trabayaron nella y dexar nel escaezu la impronta que dexó na mesma cultura americana. Y tu, ¿qué pienses?
