La canal Disney + publica delles cifres sobre cómo-y ta diendo, y resulta que non mui bien. N’últimu trimestre perdió nada menos que cuatro millones de soscriptores, exautamente de los 161,8 millones a los 157,8. Asina, la canal amiéstase a Netflix y HBO Max nesta crisis del streaming, y de la que yá hai nicios dende va tiempu (equí yá comentemos n’artículos como esti). Y anque la compaña de Mickey Mouse (personaxe que, por ciertu, va volvese de dominiu públicu nunos pocos meses, si nun vuelven a cambiar les lleis norteamericanes de drechos d’autor) sigue creciendo y cumpliendo les espeutatives de los inversionistes, gracies a la so diversificación, nun quieren que la so canal se torne una carga, y preparen grandes cambios pa ella.
Ún, que se sabe de va unos meses y tamién vos comentemos equí, ye que quieren empobinase más a crear conteníu de calidá qu’una gran cantidá d’ello, teniendo procuru en non sobreesplotar les sos franquicies más importantes (básicamente, Marvel y Star Wars) y derivando les menores a otres canales, colo que siguiríen sacando beneficiu d’elles ensin aturullar al públicu. Parte d’esta midida consistiría tamién, como yá fizo HBO Max,n’ eliminar conteníu agora accesible y con poca audiencia, qu’ocuparía más espaciu del beneficiu qu’aporta. Otra, que lleven un tiempu aplicando, ye despidir una gran cantidá d’emplegaos, lo que paez llevar per otru llau a una mayor centralización na toma de decisiones (como col despidu de grandes executivos, de lo que tamién falemos equí). Y no tocante a la canal, el gran cambiu que s’anuncia agora ye la caldía más cercana fusión con ESPN, canal deportiva, y Hulu, otra canal de streaming bien conocida y de la que Disney tien comprao adulces, a lo llargo de los años, hasta’l 67% de les acciones. D’esta manera, el conteníu de les trés plataformes va alcontrase nuna sola aplicación, masque de momentu van siguise ufriendo de manera individual pa quien nun quiera dalguno d’ello. Ello nun va impidir, porque yá lo anuncia Bob Iger, que vayan subise les tarifes de la canal, anque tovía nun aclariaron exautamente cuánto.
N’España, de momentu, namás tenemos disponible la opción de ver la canal por 8,99 euros al mes, nun esistiendo la tarifa ensin anuncios, y la canal yá ye la mayor importadora de series de Hulu (canal que nun ta disponible nel nuestru país).
