Tiénense fecho milenta películes y noveles sobre’l día nel que la intelixencia artificial nos supere y busque tomar el control del mundu. “La rebelión de les máquines”, suel llamase. Lo que nun esperábemos, y va namás unos años consideraríemos poco creyible de velo en dalguna obra, ye que fuera la mesma humanidá la que-y fuera cediendo’l poder a estes. Por embargu, agora vemos que ye lo que ta pasando adulces. Va tiempu que se tán utilizando, por casu, na bolsa, y namás estos últimos díes tán saliendo delles noticies sobre que va usase pa fines tan distintos como dirixir emisores de radio o vixilar bases militares (nes que tamién va haber perros-robó guardianes). Y según nos adientramos nesti mundu que va un par de décades imaxinábemos perllonxanu, les coses aceleren d’una manera que les novedaes queden serondes pronto.
La última d’estes noticies ye que Disney creó, a principios d’añu un equipu d’espertos col envís de buscar cómo pue la compaña recortar gastos per aciu de les intelixencies artificiales; esto ye, cuáles de toles funciones que se realicen na empresa puen faceles ordenadores, yá seya nel campu de los estudios de cine, el de les canales de streaming o’l de los parques d’atraiciones. Según un trabayador anónimu qu’entrevistó Reuters (podéis ver más detalles na noticia orixinal, que vos dexamos equí) el principal oxetivu sedría reducir el costu de les películes, yá que’l presupuestu de les grandes producciones pue llegar hasta los trescientos millones de dólares. Y esto, claro, precisa d’un ésitu enorme pa que produza beneficios. Según otru informante, yá tán usándose delles téuniques d’aprendizaxe automáticu pal cine, como sedría’l casu del movimientu de Baby Groot en Guardians of the Galaxy Vol. 2.
La fuelga d’actores y guionistes, asina como la recién sindicación d’espertos n’efeutos especiales de la que vos falábemos ayeri (equí), puen tener muncho que ver con esto, tanto por causa como por efeutu. Que nun s’utilice intelixencia artificial pa sustituyilos ye parte de les reivindicaciones de dambos, y, mientres Disney espera a que terminen les protestes (Bob Iger, direutor executivu, dixo que’l plan yera esperar a que los guionistes s’arruinen y pierdan les cases), la compaña ta esperimentando con facer guiones con IA a la espera de que los guionistes vuelvan y los rematen.
No tocante a los actores, hai quien considera que dientro d’unos años namás va ser menester grabar unes cuantes secuencies con cada actor y compra-y los drechos d’imaxe, p’a partir d’ehí construyir avatares y que fuera la intelixencia artificial la qu’actuare.
Un mundu nuevu ta construyéndose al nuesu alredor, y la verdá ye que mete bastante mieu.
