Apocayá que l’actor Liam Neeson criticó la sobreesplotación de Star Wars, y que-y daba la impresión qu’asina se perdía la maxa de la saga (cosa que vos contemos equí). Taba principiando a dar, amás, la impresión de qu’en Disney pensaben dalgo asemeyao, pos va unos díes confirmábase que de les trés películes nueves que taben tresnando, la de Patty Jenkins, la de Kevin Feige (primera d’una triloxía nueva) y de Taika Waititi, solo la última sigue alantre.
No respeutive al Universu Marvel, la popularidá de dalgunes series de Disney + nun tuvo al altor de lo que los estudios esperaben, y la ablucante cayida n’audiencia na segunda selmana de Thor: Love and Thunder (2022), cuarta película del Dios de la Truena, namás la superó la de la recién salida Ant-Man and the Wasp: Quantumania (tercera del Home-Formiga).
Bien, pos resulta qu’agora, nuna conferencia d’inversores, el direutor xeneral de Disney, Bob Iger, acaba anunciar que tán revisando con llupa la manera na que tán tratando les franquicies que poseyen, cuántos proyeutos tán en marcha de caúna y cuánto se gasta nellos, pos, afirmó, los costos tán disparaos, y non d’una manera caltenible. Lo importante, aseguró, nun ye’l volume de producciones, y ha mirase bien cuánto ha sobreesplotase cada héroe. Sobre Marvel comentó que “les continuaciones puen funcionar bien, pero, ¿precises una tercera o una cuarta, por casu? ¿O igual ye hora de tirar d’otros personaxes?”. Asina, apuntó a que, masque van volver pronto con una película de The Avengers, el superequipu nun va tener nenún miembru en común cola primer película. No tocante a Star Wars, reconoció que los deceicionó’l pocu ésitu de Han Solo, y ello fízolos pensar que taben sacando películes de la saga con una frecuencia demasiao agresiva.
Agora mesmo, amestó, l’oxetivu principal ye facer destacar Disney + sobre les demás plataformes en streaming del mercáu, y anque ellos tengan Star Wars, Marvel y Pixar, ye la calidá lo que va determinar quién gana, non la cantidá. Por ello, nun escartó tampoco qu’otres franquicies menores (anque nun mentó cuáles) puean cedese a terceros, pa nun sobresaturar y amás sacar unos beneficios estra.
