Yá ye sabío, y yá vos fuimos contando, que Disney punxo les sos garfies sobre Doctor Who, la serie más duradera de la televisión británica (trenta y nueve temporaes). Y agora, claro, quier da-y un xiru pa “marvelizala”, facela más internacional y crear a partir d’ella ponderes qu’esplotar.
El gran eventu col que Disney escomienza esta etapa nueva ye colos capítulos especiales nos que vuelve temporalmente David Tennant, probablemente la encarnación más querida del Doctor. Va nada salió un avance que nos lu presenta (dexámosvoslu calcando equí), y onde podemos ver esta “marvelización” faciendo yá efectu na saga. Pronto, anque yá l’añu viniente, vamos ver cómo se desendolca esti procesu nos primeros episodios protagonizaos por Ncuti Gatwa (Sex Education), pero’l cambiu que preparen ye tan grande que, agora, el showrunner Russell T. Davies anuncia qu’esta nun va ser la catorcena temporada, como habría ser (reiniciaron el númberu d’elles en 2005, tres el parón qu’hubo dende 1989), sinón que vuelven a reiniciar el númberu pa escomenzar pel episodiu 1×01.
Asina, la etapa de Disney preséntase como una na que nun ye preciso ver nengún de los capítulos anteriores, y de fechu Disney nun va tenelos accesibles na so plataforma de streaming. D’ella sabemos, amás, que yá tán confirmaes dos temporaes, y Davis diz que ta trabayando na tercera y hai planes pa una cuarta.
Doctor Who ye una serie de televisión iniciada en 1963, y que se tien convertío nuna parte mui importante de la cultura pop británica. El so protagonista ye un estraterrestre que pue viaxar nel tiempu y l’espaciu con una máquina con forma de cabina, y que tien enclín a llevar humanos con él nos sos viaxes. Cuando muerre, el personaxe resucita con otru aspectu y personalidá, y eso ye lo que permite que lu vayan interpretando actores distintos.
