La noticia sobre Superman espardióse bien rápido per Internet, gracies al sofitu de titulares sensacionalistes. Hebo quien s’allegró y aplaudió la iniciativa, tamién a quien se-y toció’l mexu. Los cómics tán siendo un ésitu, y yá anden a reimprentalos. El colorista fadió y dexó’l trabayu, dixo que nun quería collaborar a “arruinar” los personaxes. Y si nun sabes a qué vien too esto yes cuasique un ermitañu, comentáronlo mesmamente en telediariu. Una noticia sobre Superman nun s’espardía tanto pelos medios xeneralistes dende que “morriera” en 1992. Bono, por si acaso, voi poner el titular:
“Superman ye bisexual.”
Los más de los que s’escandalexaben, mentando una imaxe conservadora del personaxe que namás que tienen ellos nes cabeces, nun entraren nin a lleer la noticia, onde se cuenta que’l bisexual ye un Superman nuevu, el fíu de Clark Kent y Lois Lane. Sicasí, tampoco nun me paez qu’hubiera problema dalu en que’l bisexual fora’l pá (masque solo podría selo de pensamientu o nos años mozos, porque nunca nun sedría infiel a Lois), pero taría bien que la xente s’informara un pocoñín primero d’esbardiar. Ye verdá que la cosa pue despistar a quien nun tea al corriente de les hestorietes, y la primer entruga que surdió pehí y empezó a ruxise foi: “¿pero dende cuando diantres tien Superman un fíu?” Bono, masque la rempuesta ye bien revesosa, vamos tratar d’esplicalo. Más vos val poner el cintu, porque vienen bien de curves.
Como contamos nun artículu va unos meses (podéis lleelu equí), en DC tienen el vezu de, cada ciertu tiempu, facer borrón y cuenta nueva cola continuidá los personaxes, pa desenguedeyar les hestories, anovales pa que vaigan acordies a los tiempos y asegurase de que los personaxes nun acaben d’avieyar. Asina foi en 2011, añu cuando reiniciaron l’universu comiqueru y Superman dexó de tar casáu con Lois Lane, y hasta de llevar los calzonciellos per fuera pa llevar un traxe más de pol estilu de les películes de superhéroes. La idea yera atrayer llectores nuevos, y nun entamu la cosa paeció funcionar masque a abondos de los llectores de siempre nun-yos prestara un res el cambéu. En 2015, cuando la novedá escomenzaba a desinflar, ocurrióse-yos facer un “macroacontecimientu” nel que, a lo llargo de dos meses, cancelaron toles series mensuales pa espublizar cómics de los personaxes de continuidaes pasaes, tentando de contentar a señardosos mientres aprovechaben pa treslladar la empresa pa Los Ánxeles ensin facer un parón. L’argumentu de Convergence, que foi como lu nomaron, yera’l siguiente: Xusto primero de que los sos universos quedaren destruyíos, una entidá cósmica garrara una ciudá de caún y llevárales pa un planeta, axuntando toles versiones de los héroes sobre les que DC tien espublizao. El planeta, que ta vivu, fuércialos a enfrentase unos con otros, pero xuníos consiguen vencelu, reconstruyir los universos de los que provienen y volver a ellos… toos sacante’l Superman desapaecíu en 2011, la so Lois y el fíu qu’acaben tener nei planeta, Jon, qu’acaben na continuidá nueva.
El Superman clásicu tien dende entós una serie propia, Superman: Lois & Clark (2015), onde nos cuenten que la familia lleva años d’incógnitu n’universu nuevu, criando’l fíu y con Clark salvando xente ensin llamar l’atención, con un traxe negru, pa nun la entamar nin tropezar los doblos d’él y Lois. Y asina siguen hasta que’l Superman mozu muerre, y ye’l paisanu’l qu’ha adunvialu, mentanto que Jon pasa a protagonizar una serie, Supersons (2017), a la xunta’l fíu Batman. D’esta miente, volvimos a tener como Superman el clásicu, casáu y agora padre de familia, pero con una hestoria perrevesosa de contar, conque pa que’l status seya permanente faen que se fusione cola enerxía del Superman muertu, camudando’l mesmu universu. A partir d’entós ye’l Superman de la continuidá nueva’l que casó y tevo un fíu, y nunca nun hebo dos. Col orixe nuevu, Jon nun ñació n’otru planeta, sinón na Tierra.
¿Fuistis a siguime? Espero que sí, pero tovía queda un cachín. Y ye que, como yá dixi y veis na imaxe, Jon yera un preadolescente. Por embargu, ye nesa cuando DC ficha’l guionista estrella de Marvel, Brian M. Bendis, y pónenlu a escribir Superman. Como paez que convierte n’ésitu tolo que toca, la editorial dexa-y facer lo que-y dea pola gana, y como a esti nun-y peta facer hestories d’un Superman padre de familia, decide, a cencielles, mandar a Lois y al fíu de viaxe pel espaciu pa dexar l’héroe de Rodríguez. Cuando Lois torna, tiempu dempués, ye pa contar qu’un malu secuestró a Jon; enzarráralu n’interior d’un volcán onde’l tiempu pasa más rápido que fuera, y cuando Superman por fin lu rescata ye yá un rapazón. Llueu d’eso, Jon pasa un tiempín nel sieglu XXXI, na serie de Legion of Superheroes (2019), y ellí enriédase cola heroína telépata Saturn Girl.
Agora, en teniendo esta infancia tan corrida, vuelve al presente y toma’l legáu’l pá cuando esti va pal espaciu, colo que-y dan una serie propia, Superman: Son of Kal-El (2021). Nella conoz un reporteru, y nel númberu quintu danse’l besu que tien provocao tou esti xaréu.
L’argumentu esi tan gastao de “que creen personaxes nuevos, pero nun cambien los que yá hai” nun val equí, anque seya bultable qu’hai un envís publicitariu en da-y el nome de Superman xusto enantes de sacalu del armariu. Ye frecuente, en Marvel y DC, qu’un personaxe sustituya a otru un tiempu, pero l’orixinal siempre acaba volviendo. Mentanto tenemos esti personaxe, bien nuevu, representando una minoría mientres lleva la “S” icónica en pechu, y que polos avances de lo viniente tamién va manifestase escontra’l cambéu climáticu. Al aviesu de lo que creyen dalgunos, Superman ñació en 1938 como un personaxe progresista que s’enfrentaba a patrones despiadaos, maltratadores, fabricantes d’armes o políticos corruptos, y anque les hestories se tornaron más fantástiques col tiempu (sobre manera sol códigu de censura instituyíu nos años cincuenta), dacuando vuelven a centrase nello. Coime, si ye un inmigrante, un mena, criáu por una familia humilde de pueblu y con un multimillonariu populista como archienemigu. L’andar restolando ente imáxenes de los cincuenta a ver cuála paez conservadora, pa criticar con ella’l xiru actual, nun tien nengún sentíu. Superman ye bondá, tolerancia, esperanza… una brúxula pa la que mirar y saber qué ye lo correuto. Y tamién ye correuto vivir cola mirada puesta nel mañana, non ancláu en pasáu.
¿Qué sedrá del Superman nuevu nunos años? Quiciabes vuelva a ser Superboy, quiciabes tome un nome propiu. Munchos llectores piden desfacer de dalguna manera la babayada de que creciera d’esmenu. Pero la cosa pinta a que va quedar un tiempu con nós, porque la coleición ta siendo tou un ésitu. Yá anuncien, amás, un especial pal añu qu’entra onde los “superfíos” van axuntase de nueves. Y si quieren lladrar, que lladren.
