Esti mes Dragon Ball fai cuarenta años, y la verdá que quixeron celebralo a lo grande. Yá se sospechaba que diben anunciar dalgo, pero pa nada dalgo como esto: una serie nueva na que Toriyama Akira va tar tamién implicáu, talamente como na anterior. Eso sí, tovía queda como un añu pa que salga, pero sí nos ponen los caniles llargos con esti avance que trai munches novedaes.
La primera y más importante, que va cambiar el tonu la serie pa intentar recuperar la frescura del principiu, y va facer esto per aciu d’un deséu al cuélebre Shenlong (nun sabemos de quién) que va remocicar a toos pa convertilos en guaḥes: a Vegeta, Bulma… y, por supuestu, a Goku, al que podemos ver de nueves col so clásicu bastón máxicu. Si conocéis bien la saga, esiste la posibilidá de qu’esto vos suene y inclusive, quiciabes, nun vos da bones sensaciones, pos ye asemeyao a lo qu’intentaron yá en Dragon Ball GT, ensin Toriyama, y foi una serie qu’acabó siendo borrada de la continuidá. Que recurran a la mesma premisa, pero enanchándola pa qu’afecte a más personaxes, pue sonavos a dir un poco a lo desesperao.
Sicasí, hai otru datu relevante, y ye que la hestoria va asoceder ente Dragon Ball Z y Dragon Ball Super, colo que nun ye preciso que siguiereis la serie más nueva pa enteravos de lo qu’asocede nesta. Les crítiques a la serie nueva fueron abondes (como nun podía ser d’otra manera) y hai quien la dexó pa prau y hasta quien consideró que GT yera meyor y que foi un error borrala. Quien sabe, nun principiu daben a entender que Super y GT podíen ser compatibles, y pueque con esta pase lo mesmo y a la llarga acabe anulando Super.
De toles maneres, quitante los enguedeyos, lo que ta claro ye que la productora quier revilvar la franquicia, y habrá que ver si consiguen facelo. Yá vos fadremos una crítica cuando llegue la estrena.
