Nos últimos años ta poniéndose de moda un xéneru de manga que pelo menos n’Occidente nos resulta bien llamaderu, porque toca un tema que nos resulta ayenu al de la historieta: la cocina. Y ye qu’en Xapón úsase’l mediu pa munches coses, hailes de tolos xéneros y viéndense en máquines espendedores, conque tamién les hai, amunchayá, de recetes de cocina. Yera cuestión de tiempu, probablemente, qu’estos s’entemecieren con otros xéneros que tán lo más alloñaos que ye posible, y esto ye dalgo que ta pasando sobre manera dende la década pasada.
Ún de los mangues más conocíos al respeutive, y que marcó tanto que ta afitando’l xéneru, ye Dungeon Meshi de l’autora Kui Ryōko (que se traduz en castellanu, faciendo la chancia col xuegu de rol, Tragones y Mazmorras). Nél, un grupu típicu d’aventureros de mundu de fantasía medieval conoz a un nanu que los introduz nel mundu de la gastronomía monstruosa, y a parti d’ehí vémoslos enfrentándose a peligros y cocinando coses rarísimes. Por supuestu, ye un argumentu tan llocu que nun-y pue faltar abondu humor.
Y, anque’l manga s’espubliza na revista Harta dende 2014, nun ye hasta hasta agora que tenemos les primeres imáxenes del anime, l’adautación a serie d’animación. Acaba de salir el primer avance (que podéis ver calcando equí), una muestrina del entemez tan estrañu que nos espera.
Desafortunadamente, nun podemos esfrutar del manga n’asturianu, pero la editorial Milky Way Ediciones, con sede equí, en Ribadeva, tien yá publicao once volúmenes en castellanu (dexámosvos l’enllaz a la so páxina calcando equí).
