Dungeons & Dragons: Honor Among Thieves, la película basada nel xuegu de rol más famosu del mundu, barre nos cines con una estrena ablucante, racaldando nada menos que setenta y ún millones de dólares na primer fin de selmana, lo que ye cuasi la metá del presupuestu de producción. La mayor parte de los beneficios provién del ésitu nos mesmos Estaos Uníos, pero tamién tuvo mui bonos resultaos en países como Reinu Uníu, Italia o España.
Asina, l’adautación de Paramount superó toles espeutatives (calculábase que nun sacaría más de cuarenta millones) y púnxose penriba d’otros ésitos tan llamaderos como John Wick 4 o Scream 6, lo que resulta complicao pa una primer parte… Porque yá ye bultable que va ser una de munches, pos el multiversu y les posibilidaes del xuegu son cuasi incontables, con cientos de noveles ambientaes nos sos mundos y una serie de dibuxos que marcó una xeneración. Yá s’intentara nel pasáu, tamién, facer una saga de películes basaes nel xuegu, pero que foron percriticaes y cayeron mui pronto nel escaezu.
Con actores de la talla de Chris Pine, Michelle Rodríguez o Sophia Lillis, la película ambiéntase nun mundu de fantasía épica y trata sobre un grupu d’aventureros que trata de recuperar una reliquia perdida, pa lo que va tener d’enfrentase a grandes peligros como magos y monstruos de de lo más fantásticos. Hai quien compara l’estilu col de les películes de James Gunn, como Guardians of the Galaxy de Marvel o The Suicide Squad de DC.
