Una de les principales razones poles qu’a la xente-y presta Xuegu de Tronos ye polos xiros de guión que da la serie a lo llargo de toles temporaes. Bonos y malos que nun lo son tanto, ambición, lluches pol poder… Les premises de Xuegu de Tronos son úniques, pero esi componente de “sorpresa” y de “guión bien construyíu” atopámoslu tamién en “Line of Duty”.
“Line of Duty” céntrase nel llabor d’una unidá d’anticorrup nuna comisaría británica. Esto ye, un grupu de policíes que tienen per delantre la xera d’investigar a los sos compañeros (cosa que nun ye siempre agradable) y atopar si hai pente ellos dalgún que viole la llei o que tea collaborando colos criminales, comprometiendo a testigos que formen parte d’un programad e proteición de testigos, pasando información sobre les redaes que tienen pensao facer o, simplemente, faciendo que “desapaezan” pruebes y evidencies de los archivos policiales.
Personaxes humanos y coherentes
En Line of Duty nun tenemos una serie centrada nes ambiciones y nes lluches de poder; pero sí una serie onde nada ye lo que paez. Personaxes de gran bondá resulten ser, en determinaes circunstancies, Y, pel contrariu, otros que consideramos que nun tienen altor moral, demuestren tenelu cuando la historia cambia.
Los personaxes son enforma humanos, d’un mou que recuerda vagamente a Battlestar Galactica y a cómo’l guionista s’esfuerza en facer que nun heba, na midida de lo posible, “malos” nin “bonos”. Presentándolos como llevaos poles circunstancies de mou y manera que seya bien fácil pa nós imaxinanos faciendo lo mesmo qu’ellos nes circunstancies a les que s’esponen, por malo o illegal que seya.
Llama l’atención la coherencia – que raramente algamen les series – de cómo cada xiru de guión nun paez tar fechu a costafecha pa “impresionar”; sinón qu’impresiona pero que ye, al empar, natural dafechu si mos ponemos nos zapatos del personaxe o personaxes que lu provoquen.
Una narrativa policial
La narrativa de Line of Duty ye policial. Esto ye, preséntennos toles pruebes pel camín (lo que fai que-yos deamos más importancia a unes qu’a otres) pero ensin guianos o dicinos lo que tenemos que sospechar pa depués “sorprendenos”. Lo cierto ye que ye una serie que nun mos fai “tar convencíos de que’l malu ye X” pa qu’al final, nun xiru de guión, el malu seya Y. Al contrario, enfréntase al problema con naturalidá, presenta toles pruebes, nun dexa nenguna nel sombreru pa sacala a lo último como si fore un coneyu blancu.
Pero si hai dalgún momentu que llama l’atención polo bonu que ye na serie Line of Duty, ésti ye’l de los interrogatorios. Trátase d’escenes, como se pue ver nel videu que punximos más arriba, onde’l dominiu de los diálogos ye esceicional y el guionista ye quién a producir xiros dramáticos, diálogos áxiles y intelixentes (pero tamién creyibles) que mos faigan tar más en tensión que con una persecución o un tirotéu. Y caltener la tensión emplegando namás pallabres ensin recurrir a “efeutos especiales” de toa triba, nun dexa de ser una de les mayores virtúes d’una obra narrativa.
Los más:
- Los diálogos (especialmente nos interrogatorios)
- La humanidá de los personaxes
- Los xiros de guión, creyibles y naturales
Los menos:
- La temática policial, que nun innova muncho.
- Que la TPA nun se plantegue doblala al asturianu
