Substack ye una plataforma d’autopublicación que ta cambiando’l mundu del periodismu (pola falta total de censura, sacantes casos de pornografía y asediu) y últimamente tamién el del cómic. Y ye que, anque anguaño hai grandes editoriales que nun queden con tolos drechos d’autor en cuenta de dexá-yoslos (como sedría lo normal) a los autores, tampoco paez razonable que queden, como suel ser vezu, col cincuenta por cientu.
Y asina, cada poco hai más autores (y más nomaos) qu’escomiencen a espublizar por sí mesmos en Substack, y agora ye’l gran Grant Morrison (Animal Man, Doom Patrol, Seven Soldiers, All-Star Superman, editor de Heavy Metal) el que tien unos cuantos proyeutos ente manes (pelo menos cuatro) al traviés del so sellu nuevu, Xanaduum. Yá tenemos detalles del primeru d’ellos, del que Liam Sharp (col que yá trabayó en Green Lantern) va ser el dibuxante, y la verdá ye que tien tola pinta de que va ser tremendu.
Eden’s End, que ye como se llama, ye una “aventura épica de ficción científica y bárbaros prehistóricos” basada nel Vieyu Testamentu, la Epopeya de Gilgamesh, los Manuscritos del Mar Muertu, mitos sumerios y teoríes de la conspiración. Una mecedura esplosiva que, en manes d’estos dos autores, pue meter mieu pela cabeza de lo ablucante que va ser.
Prometen, amás, revelanos l’orixe secretu del Homo sapiens, del primer superhome, del primer rei… ¡y de la primer guerra interdimensional! Amás de que, polo que se ve, van da-y un toque feminista al facer d’ello una especie de “Testamentu según Lilith” (la primer muyer d’Adán en testos apócrifos) y con un protagonista conianu (que podéis ver un poco más embaxo) al que describen como “un babayu violentu”.
Los proyeutos vinientes de Morrison, de los que namás sabemos que’l segundu va llamase Poison Peach, y el terceru It’s a Dead, Dead, Dead, Dead World van tar tamién disponibles pronto, y pagando la cuotina de Xanaduum en Substack pues tener accesu a toos ellos.
Dexámosvos con unes imáxenes promocionals d’Eden’s End darréu.
