Tezuka Productions, l’estudiu colos drechos sobre la obra del “Dios del Manga” Tezuka Osamu, anuncia que va espublizar, pa celebrar el cincuentenu aniversariu de la serie Black Jack, un capítulu nuevu creáu “en collaboración cola intelixencia artificial”. Asina, tanto guión como dibuxu d’esti van ser “asistíos” pola tecnoloxía de ChatGPT 4 (qu’incluye’l xenerador d’imáxenes Dall-E 3).
Ye verdá qu’esti ye un proyectu distintu al de les creaciones realizaes dafechu por intelixencia artificial, como foi’l manga de Cyberpunk: Peach John que salió en marzu. La idea d’esto, dicen, nun ye sustituyir a los autores, sinón ayudalos. “Una gran tecnoloxía precisa considerar con procuru los aspectos negativos que se tán discutiendo anguaño. Al traviés d’esti proyectu de investigación, vamos responder a la pregunta fundamental de qué tipu de rellación ha construyise ente la IA n’evolución constante y les persones p’algamar la sociedá humana ideal nel futuru”.
La serie orixinal de manga Black Jack, ún de los más conocíos de Tezuka, espublizóse ente 1973 y 1983. Trataba sobre un ciruxanu estraordinariu que curaba casos imposibles, pero que trabayaba de manera illegal y tenía un orixe permisteriosu. Adaptóse a anime, y en 2015 salió una serie de manga, Young Black Jack, que facía de “precuela” de la serie orixinal.
