Los años noventa considérense, non ensin razón, la Edá Dorada de les aventures gráfiques. Y ye que, anque nos ochenta yá empezaren grandes sagues como les King’s Quest y les Space Quest de Sierra, probablemente foi en 1990 cuando Monkey Island y Loom marcaron un enantes y un depués. Broken Sword, Full Throttle, Sam & Max, Broken Sword, Myst o Grim Fandango son xuegos d’esti xéneru que conformaron una xeneración. Y masque ye verdá qu’agora nun ta mui de moda, marcaron tamién una escuela, un tipu d’humor, una tradición.
Ún d’estos xuegos, y que si nun mentamos endagora yera pa facelu entrar pela puerta grande, foi Simon the Sorcerer (1993), una comedia esparatada na que manexabes a un rapaz del mundu real qu’acababa nún de fantasía épica, al estilu d’El Señor de los Aniellos o Dungeons & Dragons. La parodia del xéneru fantásticu, tanto de lliteratura como cine (y, tamién, xuegos de rol) yera de lo más prestoso pa los guaḥucos más nerds, y ye normal alcontrar allabances y señardá si se restola un poco per Internet. Hasta 2009 saliéron-y cuatro continuaciones, pero los point and click yá nun taben mui de moda pa entós… Y ye una pena qu’esi 3D que-y empezaron a meter a partir de la tercer parte nun avieyó mui bien. Nun ye raro qu’ente los aficionaos namás se recuerden los dos primeros.
Sicasí, tamos de norabona. Y ye que la desendolcadora independiente Smallthing Studios anuncia que tien a puntu una “precuela” del xuegu que tien tola pinta de devolve-y la so esencia. Sobre esti, que polo que cuenten ta desendolcándolu un equipu dafechu italianu, comenten lo siguiente:
“Simon the Sorcerer Origins desendólcase xusto primero de los socesos del xuegu orixinal, creando un enllaz directu a esos momentos icónicos con una perspectiva dafechu nueva y sorprendente. L’estilu gráficu del xuegu, con ilustraciones y animaciones dafechu dibuxaes a mano, muestra una combinación perfecta d’espresiones artístiques modernes y ye un testimoniu visual del espíritu d’anovamientu defendíu por Smallthing Studios. Esti nuevu Simon tovía conserva les carauterístiques definitories de la serie que lu tienen fecho destacar a lo llargo les décades: la personalidá fuerte del protagonista xoven, rebelde y dél sarcásticu sigue ocupando un llugar central, agora arriquecíu con matices más emocionales, fondos y contemporáneos. Esti enfoque estiéndese a los moos de xuego, ufriendo una combinación de pasáu y presente que permite tanto a los fans veteranos como a los xugadores nuevos escoyer ente’l xuegu clásicu de point and click o una versión más actual, optimizada pa tolos dispositivos, con control direutu de Simón.”
Dexámosvos col avance que lu tenéis calcando equí. Sobre la fecha d’estrena, de momentu namás sabemos que va ser a lo llargo de 2024.
