L’añu pasáu contámosvos (nesta noticina que tenéis calcando equí) que’l youtuber afroamericanu Eric July, mui conocíu por criticar que les grandes editoriales de cómics tienen una “axenda política” que los desvirtúa con “inclusión forciada” nin reinicios de la continuidá que, diz, son la causa de la crisis del seutor. Y magar esta, decidió pasar a la aición y presentar un universu superheroicu propiu “de puntos que tovía creyen na maxa de la cultura”. El so primer cómic, ISOM, resultó ser un ésitu total na campaña mundial de micromecenalgu, recaldando nada menos que 3.737.920 dólares, trenta y siete vegaes más de lo que precisaben pa editalu. ¿El protagonista? Un millonariu afroamericanu de Texas, con ranchu y superpoderes, qu’ha investigar la desapaición d’un amigu de la familia. Lo que, por supuestu, va metelu en problemes. Yá nesta primer historia presentaron otros personaxes que pinten que van tener coleición propia (la heroína Yaira o’l superequipu gubernamental AlphaCore, estos últimos de moral duldosa pola mor del llibertarismu nel que se posiciona July), pero l’autor presenta agora, como segundu cómic del Rippaverse, ISOM #2, teniendo claro qu’esti héroe va ser el protagonista y centru del universu de ficción.
Ye verdá que parte del ésitu de la campaña pue tener que ver cola especulación, pos el cómic sal con trés portaes distintes y esta afeuta al cómic americanu dende principios de los años noventa. Pero que la recaldación empezara ayeri, va menos d’un día desque escribimos estes pallabras, y yá tengan consiguío más d’ochocientos cincuenta mil dólares, metá los problemes que ta pasando la industria, indica que July tocó una fibra sensible cola política de la empresa, y nun foi solo que sonara la flauta de manera aneudótica col primeru. Na historia, amás, presenta un personaxe nuevu que tamién promete pa serie propia, la heroína Bloodruth (de la que pue hasta comprase una camiseta, y quiciabes demasiao sexualizada pa los tiempos modernos), colo que’l Rippaverse abulta que vieno pa quedar.
Si vos interesa la campaña (nun sabemos si pola polémica dalguna editorial va atrevese a editar estos cómics siquiera en castellanu, muncho menos probable n’asturianu) dexámosvos l’enllaz calcando equí.
