Va unos meses que salió la primer novela de Conan escrita por Chuck Dixon, el nomáu guionista de cómics qu’agora se pasa al pulp pa contar hestories inédites del nuesu bárbaru favoritu. Esta primer novela suya, que salió en febreru, foi The Siege of the Black Citadel, onde Conan, na so etapa como mercenariu, s’une al exércitu en rebelión escontra Strabonus, rei golpista de Koth. Va poco más d’un par de selmanes salió a la venta una segunda novela de Dixon, Caravan of the Damned, na que Conan se gana la vida como saquiador del desiertu y afaya un botín ablucante… que ye del rei de Zamora, al que nun-y fai muncha gracia quedar ensin él.
El casu ye que paez qu’estes noveles tán teniendo’l so públicu, porque yá se sabe que va salir otra en dalgún momentu del añu viniente, y que tien por títulu The Pit of the Blind God. Y la cosa nun queda solo ehí, yá qu’otru productu deriváu que ta nel fornu ye un nuevu xuegu de rol, ún que funcionaría como suplementu de la edición nueva d’Adventurer Conqueror King System Imperial Imprint, tamién conocíu, a cencielles, como ACKS II, y del que’l reglamentu básicu sal a campaña de micromecenalgu esti mesmu martes (dexámosvos l’enllaz equí).
El diseñador xefe del xuegu, Alexander Macris, diz que solo’l so sistema pue facer xusticia al personaxe: “Conan ye l’arquetipu del aventureru que se convierte en rei. Nun queda en “subir de nivel”, sinón que toma’l poder y gobierna. Namás ACKS II pue ufrir una esperiencia xuegu de rol cola fondura y envergadura pa pasar d’un espaderu selvaxe a un conquistador que pisa los tronos alfayaos de la tierra coles sandalies”.
A estes, paez que Conan ta más de moda que nunca, pos la serie de cómics qu’estreno apocayá la editorial Titan, de Jim Zub y Roberto de la Torre (con un aire mui a lo Buscema), rompió tolos récores de la empresa.
