Ye un personaxe bien poco conocíu, pero allá en 1958, ente los milenta personaxes de cómic que surdíen cada añu pa desapaecer llueu nel olvidu, ún yera Raimundo de Santa Fe, un héroe asturianu al estilu d’El Capitán Trueno o El Guerrero del Antifaz.
El Duque Negro foi una serie creada pol guionista Pedro Quesada y el dibuxante José Ortiz (el mesmu equipu que creó Pantera Negra, pero’l de les hestorietes españoles y non el de Marvel), anque al artista gráficu adunviólu pronto’l más nomáu Manuel Gago.
El protagonista de la hestoria ye un sobrín d’Alfonsu II, masque al rei nun-y dan nome a lo llargo de la hestoria, y los anacronismos qu’atopamos son abondos, pero esa ye la figura histórica que los estudiosos identifiquen con “el rei”. La hestoria, que pensando Raimundo que so pá morriera (nun principiu, en verdá, ta encarceláu pol rei) enfréntase al invasor árabe con namás qu’una espada, la fe y la ropa prieto qu’indica’l llutu. Y nos más de cuarenta númberos de los que se compón la serie va enfrentase non solo a ellos, tamién a francos, a vikingos, a mongoles y a un triángulu amorosu ente la cristiana Laura y la musulmana Zulema, que tampoco ye que nun tenga demasiáu problema con convertise si ye pa tar con él.
Por supuestu, les hestories d’El Duque Negru son d’otros tiempos y otru réxime, y resulta difícil lleeles ensin quedar ablucaos cuando vemos qu’al saltar escontra los enemigos glayen coses como “¡Santiago y cierra España!”. Y, por embargu, considérase que yera una serie bastante adelantrada al so tiempu na forma de narración y, pola riestra de desgracies que recaen sobre’l protagonista, hai quien lu compara con Hamlet.
Y ye que, si escarbamos un pocoñín, ensiguida atopamos hestories enterraes y a les que podemos da-yos una vueltina. ¿Quién s’apunta esta?