La hestoria d’Asturies tien abondosos requexos escaecíos y ensin estudiar, tal ye l’efeutu avasallante de fechos y dates mitificaes como Cuadonga u Ochobre del 34, y esto, opino humildemente, ye una franca inxusticia pa colos protagonistes d’estes hestories escaecíos, que van participar tamién de l’Asturies d’Anguaño, como pa con nós mesmos. Un pueblu qu’escaez el so pasáu ye un pueblu ensin futuru, condergáu a vagamundiar per caleyes abiertes por otros intereses y otres voluntaes; y enfotase nunos socesos específicos pa estudialos (o seudo-estudialos) de manera estanca, dexando de llau tol restu d’acontecimientos d’importancia bultable, por razones que son ayenes al bon proceder hestoriográficu, ye tamién una forma d’escaecer esi pasáu.
Y ún d’esos protagonistes olvidaos de la nuesa hestoria patria ye’l Partíu Republicanu Democráticu Federal, una formación política d’impactu innegable na nuesa tierra, un partíu verdaderamente de mases que fizo d’Asturies ún de los sos baluartes. Un partíu agora escaecíu porque nun convién a nengún de los discursos políticos que se desendolquen n’Asturies pero que fizo grandes coses por esti país, un partíu del que voi desllindar la hestoria n’esti artículu a mou de redención, si me permiten la espresión.
Como en toles hestories hai qu’entamar pel principiu ¿Pero cuálu ye’l principiu d’esta hestoria federal d’Asturies? Bien, yo creo asitiar la so nación nos socesos de mayu de 1808. Afirmar que’l llevantamientu d’Asturies tenía motivaciones federales sedría faltar a la verdá, pero na Xunta Xeneral y nes sos aicioes podemos ver munchos de los teoremes que desenrollaron los pensadores federales al traviés de los sieglos XIX y XX. La declaración de soberanía asturiana ye l’amuesa mayor del patriotismu territorial y, como non, del famosu pautu federal, de cálter espontáneu. Porque Asturies llevantóse sola confiando solo en sí mesma, sí, pero tamién ye la primera n’encabezar el procesu de reorganización estatal, apellando al restu de provincies a mandar los sos representantes a Uviéu pa formar unes Cortes Constituyentes. Canga Argüelles y Pi i Margall, ente otros, ven nestos socesos una prueba del espíritu federal de los pueblos d’España y usen la Revolución de Mayu como exemplu pa desplicar la so teoría de l’autodeterminación centrípeta. La federación nun yera una concesión fecha pol poder central a los poderes periféricos, sinón qu’estos caberos decidíen llibremente axuntase los unos colos otros pa conformar un poder central, nel que delegaben potestaes y non al aviesu.
Pasa un añu y Álvaro Flórez Estrada, procurador xeneral d’Asturies, escribe un proyeutu constitucional qu’ensin llegar a ser federal anticipa yá gran parte de les idees que van defender los federales nes décaes siguientes. Ye esti un proyectu nel que’l poder llexislativu recai nun Congresu Nacional Soberanu formáu por representantes de les provincies y islles del imperiu, nomaos polos parlamentos provinciales, les Xuntes Provinciales (análogues a la Xunta Xeneral Asturiana), qu’hasta tendríen derechu al vetu en ciertes materies que dependíen del Congresu Nacional Soberanu. Nun ye estrictamente federal porque, como indica’l so nome, la soberanía reside nesti Congresu Nacional Soberanu, pero vemos claramente que la organización nacional flúi dende les provincies al centru y non del centru a les provincies, amás de qu’hai un claru respetu pa les particularidaes de cada territoriu. Trátase d’un compromisu, un compromisu que cayerá embaxo la maquinaria unitarista de la Constitución de 1812 pero que ye bien interesante, especialmente pol so paralelismu col modelu autonómicu d’anguaño.
El federalismu, ente lliberales y carlistes
Sigue corriendo’l tiempu y ente lliberales unitarios y reaicionarios carlistes nun se dan les circunstancies pa que se desendolque un federalismu fuerte, yá que la radical división d’España nun permite l’espoxigue de lo que ye una tercera vía ente les corrientes enfrentaes. El federalismu ye radicalmente lliberal, al contrariu que’l carlismu, pero tamién radicalmente anticentralista, al contrariu que’l lliberalismu de la época. D’esti mou les enseñances de Canga Argüelles, autor de Cartas de un americano sobre las ventajas de los gobiernos republicanos federativos, y de Flórez Estrada queden conxelaes nel tiempu; pero la industrialización asturiana avanza a reblagos, tresformando’l nuesu país, que pasa nun curtiu espaciu de tiempu de ser un territoriu rural y escaecíu a ser ún de los motores industrial-mineros del estáu. Y con estos avances apruz tamién un nuevu proletariáu, una nueva masa crítica qu’arrenuncia al tradicionalismu ruralista y abraza les nueves corrientes republicanes.
Pue dicise que la muerte de la Xunta Xeneral en 1834 ye la qu’abre esti nuevu períodu p’Asturies, marcáu pol crecimientu d’estes tendencies republicanes qu’abrirán camín pal federalismu n’años posteriores. Pedro Celestín Méndez de Vigo, mariscal asturianu y héroe de la Guerra d’Independencia, que sirvió nel Exércitu Defensivu Asturianu, sedrá ún de los mayores representantes d’esta corriente republicana, xunto col sobrín del teniente xeneral Rafael del Riego, Antonio del Riego.
Esta actividá republicana y democrática pronto lleva a la constitución del Partíu Democráticu, nel que taben integraos los republicanos federales al entamu, que tamién llegó a Asturies y, adulces, entamen a apaecer publicaciones periódiques que defendíen los ideales democráticos, como El Asturiano, nos 50, y La Joven Asturias, caballu de troya de los federales republicanos nacíu nos años 60 del sieglu XIX. L’actividá republicana ye cada vegada mayor.
Y nesti contestu españa la Revolución de la Gloriosa. D’un plumazu desapaecen los borbones y n’España ábrese la puerta a nuevu futuru, pero’l Partíu Democráticu de Prim nun ta pola llabor d’afitar la república y muncho menos la federal, polo que ñaz súbitamente’l Partíu Republicanu Democráticu Federal, con Pi i Margall a la cabeza.
N’Asturies el partíu espárdese como la pólvora y apaecen comités federales en más de venti conceyos. N’Uviéu y Xixón, por exemplu, los federales estructuraren l’actividá política de la ciudá y, consecuentemente, apaecen nuevos periódicos como El Federal Asturiano, El Hijo del Pueblo, La República Española o El Municipio Federal. Ye entoncies cuando aporta’l primer momentu de gloria de los federales asturianos. Nel branu de 1869 una comisión integrada por personaxes como Eladio Carreño Valdés, Wenceslao Guisasola o Rafael González Posada robla en A Coruña un pautu federal ente Asturies y Galicia que desencadenó la euforia mesmo del pueblu gallegu que del asturianu, llegando a axuntase ente 8.000 y 20.000 persones nel puertu de Xixón pa recibir a los miembros de la comisión que volvíen a casa. Y n’ochobre d’esi mesmu añu, el segundu.
El Gobiernu Provisional decreta una serie de lleis que los federales consideren inalmisibles y el día cinco (65 años enantes de la otra revolución d’Ochobre) una partida de federales asalta la Fábrica de Trubia p’armase de los fusiles qu’ellí había y échase al monte pa defender la República Federal y el Cantón Asturianu. Anque acabarán por dispersase y el so cabezaleru, Bernardo Coterón, marchará al exiliu, ye un momentu clave porque adelanta los socesos de la revolución cantonal de 1873.
11 de febreru de 1873, en Madrid proclámase la República Española y unes hores más tarde la civil interina Balmori sal al balcón de la Casa Conceyu uvieína pa proclamar tamién la República, sí, pero la República Federal, cuatro meses enantes que les Cortes la proclamaren. Déxase asina bien claro la fuercia que teníen les postures federalistes n’Asturies.
Desgraciadamente la I República, atacada dende tolos frentes, nun ye a sobrevivir y la Constitución de 1873, col so gran potencial, queda pa práu; pero los federales nun se rinden y durante la Restauración desendolquen un gran llabor d’oposición, al tiempu qu’afonden nos sos plantegamientos políticos y refinen los sos programes. N’esti marcu de reconstitución teórica llega’l tercer momentu de gloria pa los federales; el más sublime de toos. En 1883, tres díes de conceyos y alderiques, la Asamblea Rexonal del PRDF aprueba’l Proyeutu de Constitución Federal del Estáu Asturianu, un proyectu constitucional nel que s’afirma la nuesa soberanía, la soberanía del pueblu asturianu, de la nacionalidá asturiana, como diz Wenceslao Guisasola,afírmense grandes llibertaes civiles, munches d’elles pioneres y hasta apaez mencionada la nuesa llingua como lo que ye, una llingua de plenu drechu.
El réxime de la Restauración nun permitió al PRDF algamar los sos ambiciosos oxetivos y, sobremanera a la muerte de Pi i Margall, el partíu dirá perdiendo fuercia, anque nél llegarán a militar asturianos tan ilustres como Julio Somoza, Félix Aramburu, Braulio Vigón (integrantes del grupu La Quintana) o Pepín de Pría, amás de Pachín de Melás y hasta Manuel Rico Avello, magar que llueu desertare a l’Agrupación al Serviciu de la República.
II República, una oportunidá federal
Llega la II República a Asturies y los federales salúdenla con entusiasmu, prueba d’ello ye que en Xixón, el 14 d’abril, ízase una bandera republicana federal, fechu nada estrañu si consideramos que foi el Partíu Federal el vencedor de les eleiciones municipales. Amás, nun pierden el tiempu; yá en mayu una gran balasma axúntase na Plaza del Carme pa sentir a Eduardo Barriobero, Luis de Zubillaga, Benigno Fernández y a otres personalidaes del PRDF y a día 19 de xunu d’esi mesmu añu Rico Avello afirma en La Voz de Asturias que l’Asamblea Federal d’Uviéu tien preparáu un Estatutu d’Autonomía p’Asturies, cosa que confirma’l 22 d’agostu nel periódicu madrilanu Crisol, pola mor d’unes crítiques al procesu estatutariu asturianu qu’apaecieron nesi diariu a día 18 del mes mencionáu. Nes eleiciones de xunu de 1931 el partíu federal saca 16 diputaos, cuatro d’ellos por Asturies: el propiu Barriobero, presidente del partíu, con 28.762 votos, Emilio Niembro, con 24.576 y otros dos que pertenecíen a la Federación Agraria Asturiana (únicu partíu propiamente asturianu con representación bultable na dómina), cola que diben en coalición, llamaos Ángel Sarmiento (26.627 votos) y Ángel Menéndez (27.233 papeletes). Ye de destacar, tamién, que Rico Avello algamó 70.348 votos, anque acabó por integrase n’Agrupación al Servicio de la República, como yá dixi (recordarán vs. que muncho de lo qu’equí se diz yá lo comentare n’otros artículos, y ye que resulta difícil facer un análisis estancu dafechu de tolos elementos del asturianismu o proto-asturianismu).
El futuru paecía prometedor y, tal como afirma el periódicu El Aldeano de Castropol (nel que tamién apaez un llamáu a l’autonomía espublizáu el 15 de mayu de 1931) el 30 de mayu de 1932 y como confirma el diariu xixonés La Prensa el 8 de xineru de 1933, hasta llega a conformase una comisión estatutaria p’Asturies, na que taba Rico Avello; pero’l Partíu Federal, dividíu internamente, acaba por dixebrase y llega en mui mala forma a les eleiciones de 1933, na qu’algama solo 4 diputaos. La victoria de les dreches, ye de suponer, tamién asesinó al estatutu asturianu enantes de que llegare a nacer.
Los federales, que tamién participen na segunda Revolución d’Ochobre, intenten reconstituyise y Barriobero llega a roblar un alcuerdu col Partíu Sindicalista d’Ángel Pestaña, pero la formación del Frente Popular dinamita cualesquier esperanza pa los federales, porque nun se-yos permite entrar a la coalición (prueba de les simpatíes que sentíen les fuercies republicanes y obreres pa les idees federales).
D’esti mou llega la Guerra Civil y los federales asturianos collaboren coles fuercies del Frente Popular, anque yá nun calteníen malpenes estructura de partíu. Benigno Fernández, cabezaleru de les mocedaes federales, entra a formar parte d’una comisión xudicial en Xixón, por exemplu, y consta que munchos foron represaliaos a la entrada de los nacionales n’Asturies, como Modesto Tolívar de la Vega, conceyal federal de Gráu.
Cola cayida d’Asturies cai tamién al pozu del escaezu el Partíu Republicanu Democráticu Federal, colos sos miembros muertos, nel exiliu o na clandestinidá. Los años escuros de la dictadura encargaránse de desaniciar tou rastru del PRDF y cuando llega’l tiempu de la reconstitución democrática asturiana yá nun queda naide pa recoyer el so llegáu.
Gran traxedia ensin dubia la d’esti partíu que trabayó tanto por Asturies y que foi pioneru en munchos aspectos. Agora solo quedamos unos pocos que s’alcuerdan d’él, anque espero que con esti artículu l’autor d’estes llinies esconsoñare en vós un nuevu interés por rescatar a los federales del requexu escuru de los derrotaos de la hestoria, y perdonen el mio atrevimientu no que cinca a esto.
