Magar l’andanciu del coronavirus, esti añu’l Celsius 232 algamó la so décima edición. Pa los que nun lu conozáis, ye un festival centráu na lliteratura de terror, fantasía y ciencia ficción, que cada añu trai a Avilés a una montonera d’autores nacionales y internacionales. Na so décima edición el festival tuvo más de 130 autores convidaos.
El festival desendolcóse ente’l 13 al 17 de xunetu nel centru d’Avilés, repartíu ente la Casa de Cultura, nuna carpa y puestos montaos na plaza Domingo Álvarez Acebal, nel Parque de Ferrera y na plaza del Ayuntamientu, pela mañana y pela tarde. Amás, non solo incluyó actividaes lliteraries, dende va años tien otres secciones venceyaes a la temática, como por exemplu Cine na cai, un Taller lliterariu, Lletres y bits, Cosplay, Xuegos de rol y Xornaes de doblaxe. Nun vamos engañavos, resumir tol conteníu del festival ye abondo complicao, polo que ficimos una escoyeta.
Esti festival ye una oportunidá pa conocer y escuchar a tolos autores invitaos, qu’amás firmen la so obra nel puestu conocíu como’l firmódromu y faen hasta semeyes contigo (esti añu calteniendo les distancies de seguridá).
Los autores de fantasía y ciencia ficción asturianos nun llugar destacáu
El festival puxa polos autores de xéneru d’Asturies y tamién polos qu’escriben n’asturianu. Yá l’añu pasáu pudieron dedicar una xornada a presentar lliteratura de xéneru d’autores de la nuesa provincia o venceyaos a ella, y esti añu sumóse una charra sobre lliteratura n’asturianu. Na charra, que tuvo mui bona acoyida, intervinieron Inaciu Galán, Monsté Machicado, Nicolás Bardio y Blanca Fernández, y nomábase “¿Lleguen aires nuevos a les lletres asturianes?”. Tamién se presentaron les obres Les croquetes del señor Keller (Jorge Salvador), Whitechapel (Saúl Fernández), Dharani: Maia y Hestia (Isabel Collazo), Hilatura (Alicia Andrés), Erdevaile (Daniel Sierra), Superhéroes, guerreros y magos viaxen en naves espaciales (Jorge López Novales). Tenemos que facer mención especial a J.P. Sylvester, qu’amás de presentar El pelegrín: los magos de la lluz blanca, foi vistíu como’l so protagonista.
Dientro de los invitaos nacionales asistieron César Mallorquí, toa una referencia de la lliteratura xuvenil, que presentó El círculu escarlata (que sigui la historia de Les llárimes de Shiva); Victoria Álvarez, autora d’obres como La voz d’Amunet, Les eternes o La conxura d’Aramat; Angela Pinaud, que presentó Animales de peluche; Carlos Sisí cola so obra Homine ex machina; Patricia García-Rojo cola so obra Migraciones,…y munchos más. Nun podemos escaecer la presencia d’Elia Barceló, una habitual nel festival, y qu’amás presentó les obres ganadores del I Premiu Internacional d’álbum illustráu “Elia Barceló” con dalgunos de los autores.
Los vampiros: protagonistes
Esti añu hubo una presencia d’autores de lliteratura vampírica (y d’otres obres de xéneru) nel festival, y participaron en delles conferencies Dhonielle Clayton, Zoraida Córdova, Tessa Gratton y Natalie C. Parker, aparte de Claudia Gray(de la que vos falamos un poquitín más abaxo).
Fueron munchos los autores internacionales qu’asistieron, ente los que vos podemos mentar, por exemplu, a Thomas Olde Heuvelt, un de los autores holandeses de terror más conocíos anguaño y autor de Hex; Seanan McGuire, autora de xéneru y guionista de los cómics de Spider-Gwen; David Wellington, autor de la triloxía Zombie; o Henrik Tamm, autor de Ninja Timmy y diseñador conceptual de películes como Shrek, Pantera Negra y Cróniques de Narnia.
Na sección de rol, coordinada pol Hangar Rebelde (y más concretamente por Jorge Etchegoyen, que presentó les actividaes), hebo charres y partíes tolos díes, ente les que tuvo la presentación de Depués d’Ochobre: el xuegu de rol, con Xon de la Campa y Nicolás Bardio;la charra“Los secretos d’un creador de xuegos de mesa”con Enrique Dueñaso“Neinhaim: plasmar un mundu nun xuegu”con Enrique Dueñas y Aranzazu Serrano.
El cine na cai ye una actividá que se desendolca na plaza del Ayuntamientu, y na que tolos díes pela nueche se pon una película venceyada a la temática del eventu y les actividaes. Esti añu les películes elexíes fueron Gremlins, The host, Cristal Escuru, Stardust y Shrek. Los fans d’Star Wars, que tamién tien una sección propia, tuvieron la oportunidá de conocer a Claudia Gray, autora de delles noveles ambientaes nesi universu y autora de la saga vampírica Medianoche. Como tolos años, tamién tuvo convidada la Orden 66, que desfiló colos sos traxes d’Star Wars. Tamién participó la Escuela Asturiana d’Esgrima Antigua, habituales nel festival, que dieron tolos díes talleres y exhibiciones. Amás, el so fundador, Pelayo Megido dio con Nieves Rico la charra “L’asesoría histórica: divulgación vs. Estética”.
L’añu caberu inauguróse la sección Historia oculta de la música, que se volvió a facer esti añu coles charres “Diabolus in música: De música y demonios varios” y “Réquiem pal xefe final”, cola participación en dambes de Luis Antonio Múñoz, acompañáu na segunda por Edgar S. Fuentes.
Un güeyu puestu nos videoxuegos
Na sección Lletres y bits, dedicada a los videoxuegos, hubo más de cinco ponencies. Ún de los invitaos yera John Garvin, director creativu y/o guionista de xuegos como Uncharted o Days Gone. Amás, per primer vez dióse el Premiu CIMA Games al talentu na Industria de los videoxuegos, que ganó Tatiana Delgado.
Otros premios qu’entrega’l festival son los Premios Kelvin, con categoríes que premien a les noveles de xéneru. Les noveles premiaes fueron Newropia de Sofía Rhei, Hex de Thomas Olde Heuvelt, L’asesín d’alfes (Patricia García-Rojo) y La historia imposible de Sebastian Cole (Ben Brooks). Amás, tamién entreguen los Premios Lorna a cómics de xéneru, ganaos esti añu por La Cólera (Santiago García y Javier Olivares) y Matadero Cinco (Ryan North y Albert Monteys).
La sección de Cosplay tuvo esti añu seis charres que tocaron la creación d’armadures, fotografía, carauterización y l’acosu nes res sociales. Esti añu tuvieron como invitaos cosplayers el tándem habitual nel festival Manlima cosplay, Anhyra cosplay, Tifa Flynn, ZananWars y Shiroychigo.
No que cinca a les midíes de seguridá pol aciu del coronavirus, l’embozu yera obligatoriu n’interiores y n’esterior y había repartíos pel festival cartelos desplicando les normes sanitaries. Amás, desinfestaben se les siyes y micrófonos ente charra y charra, taben colocaes cola distancia de seguridá y dexando espaciu y había que se rexistrar con un códigu QR como asistente a les charres, que te pidía un corréu o teléfonu p’avisar en casu de qu’haya dalgún positivu en coronavirus.
El Celsius 232 zarró esta décima edición anunciando les feches pal festival en 2022 (del 19 al 23 de xunetu de 2022) y anunciando yá a dellos invitaos, ente los que tá Noelle Stevenson, autora de Nimona y productora executiva de She-ra y les princeses de poder.
