Magar ser un productu multimedia, foi nel cómic indie, yá va cuasi cuarenta años, onde nacieron les Tortugues Ninja de la mano de los autores Kevin Eastman y Peter Laird. Eso sí, les versiones de los dibuxos, les películes y los videoxuegos fueron enanchando abondo la mitoloxía, y dándo-yos tamién detalles que quedaron como imprescindibles (por casu, nun principiu toles tortugues llevaben les cintines coloraes, cosa que nun daba más n’orixe porque los cómics yeren en blanco y negro). Tres munchos años d’ausencia nel mediu, la editorial IDW tráxoles de nueves en 2011, y la serie (que sigue una continuidá nueva) tovía dura y tien el sofitu de crítica y públicu. Tanto, de fechu, que-y tán saliendo ponderes, y una bien esitosa foi la serie curtia Teenage Mutant Ninja Turtles: The Last Ronin (2020), qu’amás la crearon los autores orixinales.
L’argumentu: Nun futuru non mui llonxanu, pero sí bien murniu, el malváu Clan del Pie fízose cola ciudá de Nueva York. Nel camín a ello, trés de les Tortugues morrieron. Por embargu, una sigue viva (¿cuála?, ah, amigu, ye spoiler), y tien planiao vengase de toos ellos pa facer xusticia a los sos hermanos.
La serie foi un completu ésitu, yá-y salió una precuela (The Last Years) y hasta punxeron figures de coleicionista a la venta, costando la más detallada más de mil seiscientos euros. Y, agora, la saga trespasa de nueves el novenu arte pa llegar a los videoxuegos, de manes de Black Forest Games (THQ Nordic), los mesmos creadores de Titan Quest, Giana Sisters, Fade to Silence o Destroy All Humans!. Otra cosa que sabemos ye que va ser un videoxuegu d’aición y rol, al estilu de God of War, dicen. Pero poco más. Eso sí, tenemos un avance que, anque la verdá que diz mui poco, va poniendo los dientes llargos.
Dexámosvoslu calcando equí, y en cuantes sepamos más contámosvos.
