Yá tarán vustedes, señores llectores, avezaos a los mios artículos xusticieros que traten sobro temes escuros que poca xente conoz. Primero falé del proto-romance ente Túrin Turambar y Beleg Cuthalion que Tolkien desendolcó nes versiones primixenies de lo que llueu sedría El Silmarillion, depués de Kiril Eskov y el so llibru, fici un repasu polos personaxes más escaecíos de la nuesa hestoria patria etc. Y agora toca que-y faga xusticia al liriu, tienru xuegu tradicional que sirvidor quedría ver restituyíu a la so antigua y yá escaecida gloria. Cenciellu d’entender, entreteníu, el liriu ye un xuegu que nun se merez quedar condergáu a una nota a pie de páxina nun llibru que nun futuru faga otru desafortunáu asturianista sobro los nuesos xuegos tradicionales.
El liriu, como yá dixi, nun podría siguir un plantegamientu más simple que’l qu’agora voi desplicar. Hai tres elementos: la machorra, un palu allargáu y consistente de maera, el liriu, un palu más pequeñu afiláu pelos dos estremos, y el castru, un aru (que nin siquiera ye necesariu dafechu, como yá veremos) y l’aición del xuegu consiste, básicamente, en golpiar al liriu, que taría posáu en suelu, cola machorra y una vegada que tea nel aire da-y de nueves p’aventalu dientro’l castru o lo más cerca posible d’el. Como podrán suponer, gana’l xugador que menos intentos necesite pa encastrar (ye dicir, meter el liriu en castru).
¿Más cenciellu imposible, verdá? Bono, suena más fácil de lo que ye y esti qu’escribe pue asegurar que se tarda en dominar dafechu’l xuegu, pero cuando yes a llevantar el liriu y depués a aventalu pel aire unos cuantos metros sientes una gran fola d’emoción gratificante. El xuegu faese amenu y divertíu, amás de qu’hai un grau importante de tensión, pues ye mui fácil quedar na redolada del castru, col liriu saltándolu penriba pero ensin cayer nél, aumentando asina progresivamente’l númberu d’intentos (Un sirvidor vivió esa situación más d’una vegada).
Considerando esto ¿Por qué nun se dediquen más esfuercios a recuperalu? Hai numberosísimes peñes de bolos de toles modalidaes qu’esisten y sí, los bolos son un deporte que tamién hai que recuperar y ponderar, esti escritor ye gran aficionáu de la cuatriada, pero, seyamos francos, los bolos necesiten una infraestructura importante y, polo menos nos bolos de cuatriada, nun hai naide qu’entienda la puntuación si nun se pasa una tarde entera estudiándola. El liriu pue ser un xuegu que nun orixe yera infantil, pero ye, como diría un italianu, “facile e divertente”. Solo necesites la machorra y el liriu, elementos que nun son mui difícil de consiguir y nun ties que ser matemáticu pa saber quién va ganando a cada instante.
Ye, amás, un xuegu que suel atrayer l’atención de la xente, créanlo o non. Nun foren poques les tardes de xuegu nel campus de El Milán o nel Campillín en que los mios compañeros y yo vimos con franca incredulidá cómo se nos acercaben y hasta pidíen probar el xuegu mozos y moces de la nuesa edá. Y, claro ta, tamién s’allegaben a nós paisanos que conocíen el liriu porque lu xugaben de nenos o porque lu vieron xugar.
Nun toi diciendo que-y guste a tol mundiu, pero tien un potencial mui desaprovecháu. Discúlpenme si nun tan d’alcuerdu con esto, pero sirvidor cree que con un poco d’esfuerciu podría popularizase de nueves, como xuegu y como deporte. Yo mesmu fui a introducilu con éxitu na mio redolada y agora xuego colos mios collacios con regularidá (una regularidá qu’asombra a munchos) ¿Tan raro sedría que munchos más asturianos volvieren los sos brazos de nueves pal liriu?
Non solo ayudaría a rexenar l’espíritu asturianu, a dinamizar la nuesa vida cultural y a reforciar la nuesa identidá, amestando futuru con tradición, sinón que sedría de gran utilidá pa fortalecer los llazos d’unión con otros países, como Galiza, onde xueguen una forma mui similar d’esti xuegu, a la que llamen “billarda”. De fechu yá llegaron a facese campeonatos ente una selección galega y otra asturiana (la última copa ganámosla nós, anque los nuesos hermanos galegos dieron guerra y nun nos dexaron victoria fácil; el resultáu final foi de 50 a 46).
Yo, dende esti humilde espaciu, quiero encamentavos a que probéis el xuegu y, en casu de que vos preste (cosa que nun tien por qué ocurrir), a que sigáis xugando y esfrutando d’el. Munches vegaes dixi, medio en chancia, medio en serio, qu’a güelpe de machorra ñacerá una Asturies nueva; pero reflexonando sobro esa sentencia, quiciabes tenga dalgo de verdá. Abrazar de nueves al liriu ye abrazar parte de la nuesa identidá, ye dar un pasu más na dignificación d’Asturies y ye recuperar una reliquia d’ente los restos del cuasique universal naufraxu del alma asturiana.
