L’área temática d’Universal Studios Hollywood (California) dedicada a Super Mario abrió por sorpresa esti xueves, permitiendo sacar imáxenes y videos a los visitantes. Masque nun va abrir dafechu y oficialmente hasta febreru, esto foi un “simulacru”, una visita pilotu na que los visitantes atoparon abierta una tubería verde que los llevaba a una recreación ablucantemente bien fecha del Reinu Xampiñón.
Yá esiste, dende 2021, un parque similar n’Osaka, Xapón (del que ye en verdá la imaxe de portada, pola mor de la falta d’imáxenes del nuevu), y que diseñó’l mesmu Miyamoto Shigeru, creador orixinal del xuegu, p’asina asegurar la so fidelidá al conceutu orixinal. L’ésitu tremendu que ta teniendo emburrió a la compañía a facer otru en California, y tán tamién en construcción ún en Singapur y ún n’Orlando. Por embargu, mientres que’l de Xapón cuenta con una montaña rusa (Koopa’s Challenge, basada nos xuegos de Mario Kart), un tren de la bruxa (Yoshi’s Adventures) y pronto va contar con otra atraición basada en Donkey Kong, el de California namás que cuenta, de momentu, con un simulador en realidá virtual de Mario Kart.
Sicasí, les imáxenes tomaes polos visitantes son impresionantes, como la del vidéu que pues ver calcando equí. Y, teniendo en cuenta que Port Aventura ye un parque d’Universal, quiciabes nun andamos lloñe de tener un Nintendo World bastante cerca.
