Va nada qu’acabaron de rodar Kingdom of the Planet of the Apes, la entrega nueva de la saga d’El planeta de los simios y que se convierte na cuarta dende’l rellanzamientu de 2011, esperándose la so estrena pa mayu de 2024. Esta ye, amás, la primera na que ta involucrada Disney, pos hasta agora facíales Fox y, como yá sabréis, l’imperiu del entretenimientu compró esta productora en 2019, dos años depués de la estrena de la última entrega, The War of the Planet of the Apes. Con ello fízose con toles propiedaes intelectuales de Fox, y hasta acaba de sacar, como yá vos contemos equí, una llinia de cómics Marvel acutada pa aprovechar estes (porque, claro, tamién compró Marvel en 2009).
Agora, como’l portal Giant Freakin Robot confirma (podéis ver la noticia orixinal equí), Disney prepara tamién una serie de la franquicia, que según nos cuenten taría asitiada na mesma continuidá que les películes. Al dir estrenase poco depués de la nueva, dicen qu’ente 2024 y 2025 (en Disney +, por supuestu), podemos suponer que van tar venceyaes, de manera que Kingdom sirviría de presentación pa ella. Como nes trés películes anteriores nos tienen contao’l procesu pol que’l mundu normal se convierte nún mui paecíu al que conocemos de les películes orixinales, too pinta a qu’esta última va dexar les coses tan asemeyaes a esi mundu que la serie va poder beber bien d’elles. Por embargu, ye mui poca información la que tenemos tovía al respeutive.
Anque los más conocemos la saga pola mítica película de Chalton Heston de 1968, que contó nada menos que con cuatro continuaciones, una serie de televisión y adautaciones a cómics, en verdá esta taba basada na novela de Pierre Boulle, de 1963, La planète des singes. Esti ye yá’l segundu rellanzamientu de la franquicia, depués del fallíu de Tim Burton de 2001.