Ye un manga mui popular pa ser tan recién (el primer capítulu salió en 2019), pero tien esi factor X col que delles obres son a llegar al corazón de la xente. Nél, un espía “westfalianu” ha formar una familia falsa pa trabayar infiltriáu nun país enemigu, Ostania (son, en verdá, Alemaña del Este y del Oeste), y asina acaba conviviendo con una asesina que fai de la so muyer y una neña güérfana con telepatía que fai de la so fía, lo que va trayer venceyaes un montonáu de situaciones absurdes. Hasta, daglo depués, tienen un perru aldovinón. Ye un argumentu mui llocu, o asina paez al resumilu tanto, pero tanto’l manga como l’anime (estrenáu en 2022) tán teniendo un gran ésitu… Y, como nun podía ser d’otra manera, eso fai que saquen otros productos derivaos.
Ún d’ellos ye un videoxuegu, SPYxFAMILY: OPERATION DIARY (nome del avance en YouTube, pero n’abondos portales llámenlu SPYxANYA: Operation Memories), nel que vamos controlar a la más pequeña de la seudofamilia nuna “aventura relaxada”, na qu’hemos guiala pa que quede con bones alcordances qu’apuntar nel diariu que-y manden escribir como xera escolar. Ente les maneres de facelo, podemos ver nel avance acabante sacar del fornu que va haber xuegos de cartes, simulador de cocina, busca de bones semeyes que facer o minixuegos deportivos. El xuegu estrénase en 2024, y va salir pa Playstation 4 y 5, Nintendo Switch y PC.
Por si queréis saber más, en castellanu edita’l manga la editorial Ivrea (dexámosvos l’enllaz calcando equí) y l’anime ta n’accesu na plataforma de streaming Crunchyroll.
Dexámosvos l’avance calcando equí.