Dende qu’entamó la cuarentena, n’Asturies surdieron delles iniciatives nel ámbitu de la cultura asturiana. Editoriales como Trabe o Suburbia Ediciones que dexaron dellos llibros n’accesu llibre, otres como Radagast que sacaba un llibru electrónicu de baldre fechu a costafecha pa la cuarentena. De toes maneres, la que ta siendo la iniciativa d’esta cuarentena ye’l #FormientuEnCasaFest, el primer festival cultural “en casa”, nel qu’hai un ciclu de conferencies que nun apara nin les fines de selmana onde cada día hai un conferenciante o artista que fai una conferencia, charra, relfexón o, nel casu de los músicos, conciertu.
Esti festival, del que yá informáremos en Refuelgu va unes selmanes acaba de dar anuncia de que la so programación va allargase nes prósimes selmanes. D’esti mou, FormientuEnCasaFest que los organizadores califiquen d’ “un ésitu”,
¿Qué va haber na próxima edición de #FormientuEnCasaFest?
Ayeri faló Arancha Margolles de cómo facer xenealoxía dende casa pa poder conocer los raigaños y l’orixe de los apellíos d’ún emplegando les ferramientes qu’ufierta internet. Güei 1 d’abril ye’l turnu de la escritora y presentadora de la Clá Invisible en PlayPresta Laura Marcos que dará una conferencia sobre l’emplegu de la escritura n’asturianu. Mañana día 2, va ser el turnu de Marisa Valle Roso, que fadrá un pequeñu conciertu colos temes n’asturianu de los sos discos. Conciertu que vais poder sentir a les 19h00 como tolos díes d’esti festival. Luis Nuñez va presentar esti vienres el discu Blinca, onde va cantar dellos de los temes que lu componen y falar tamién de cuála ye la so trayeutoria musical. La fin de selmana vien cola presentación de Maxi Areñes fadrá un conciertu-recital onde se mece lo lliterario y lo musical que va siguir esti sábadu con Alfredo Garay cola presentación d’un recital de poesía. Raúl Alonso, un escritor bien mozu, va ufiertar tamién un recital poéticu’l llunes. Esti poeta mozu tien yá obra asoleyao y hasta un llibru en tiendes. La escritora María Abril fadrá una charra col títulu de “un rellatu y otres coses”. El miércoles 8 Nacho Wings DJ y direutor d’un programa en PlayPresta que se llamaba “el xiradiscos” va facer una seleición musical pa la cuarentena. El 9 lléga-y el turnu a Laura Iglesia que va falar d’ún de los xéneros menos conocíos y cultivaos de les lletres asturianes: el teatru, cola charra “El teatru n’asturianu – la mio esperiencia personal”. El día 10 llega otru recital poéticu de Susana Sela con “Inversu baxo l’agua”. El día 11 la filóloga y llibrera Natalia González Menéndez fadrá una charra col títulu “Edición asturiana – recomendaciones d’una llibrera”. El domingu 12 Javier Callado fadrá un recital poéticu col títulu de “Charra confinar feliz” y el día 13, llunes, zarrará esta primer ampliación del programa l’editor d’Ediciones Radagast, Nicolás Bardio, que presentará’l llibru electrónicu de baldre n’asturianu y castellán “Fecho na cuarentena”
¿Por cuála de toes ye pola que más tais naguando?
