Refuelgu! tuvo la ocasión de poder probar n’esclusiva una versión Alfa del que ta llamáu a ser el primer videoxuegu n’asturianu: “Tiempu de Lleendes”. El títulu, que desendolca l’autor y collaborador d’esta redaición Adrián Carbayales, trespórtanos a un RPG medieval-fantásticu nel que mos ponemos nel pelleyu de Xandria, una aprendiza de bruxa adolescente que tien que dir a clas a deprender fechizos y ayudar a la madre coles xeres de la casa y poco a poco la cosa va volviéndose más y más épica.
L’arquiteutura de Tiempu de Lleendes, pal que nun tenga’l vezu de xugar a videoxuegos, asemeyaríase a títulos como Pokémon: Gráficos cenciellos, opciones de diálogu y un sistema de xuegu basáu en dir consiguiendo recursos (perres) y oxetos máxicos colos que dir enfrentándose a los desafíos que-y lleguen al nuesu personaxe. Esti xuegu desendólcase con una dosis d’humor bien alta (y un humor bien asturianu) y mos lleva a un mundu irreal y fantásticu que, nun principiu, nada nun tien que ver con Asturies anque sí que bebe de les mitoloxíes llariegues.
L’apueste del videoxuegu pola mitoloxía asturiana vémosla yá de mano nuna introducción na que vemos cómo un “espía moru” ataca al que paez ser un magu que quier destruyir un portal. Depués d’esta introducción non-xugable, el xuegu llévanos a ponenos nel pelleyu de Xandria, una aprendiza de bruxa que tien que facer un esame y dir aprendiendo conxuros máxicos y a enfrentase a distintos problemes. Nel so día a día, tanto la madre como’l restu de vecinos y comerciantes del pueblu nel que vive, van dir pidiéndo-y favores que’l xugador va poder escoyer si los fai o non y va consiguiendo recompenses. Depués d’un cachu, el tonu del xuegu va cambiando y vuélvese más épicu, teniendo’l xugador qu’abandonar el pueblu. El videoxuegu ta entá nuna fase de desendolcu bien avanzada, anque tovía-y queda pa llegar a la Beta.
Adrián Carbayales: La cabeza detrás del proyeutu
Adrián Carbayales ye ún de los traductores d’Ediciones Radagast que ta trabayando en dellos proyeutos de traducción dende l’inglés al asturianu d’obres de fantasía. La so intención ye sacar el proyeutu a Crowdfunding que va contar col sofitu de la Editorial Radagast. Depués del primer xuegu de mesa d’adultos: “¿Cuála ye?” y del primer xuegu de rol de mesa “Depués d’Ochobre”, “Tiempu de Lleendes” vien a llenar un espaciu vacíu na estaya lúdica asturiana, el de los videoxuegos, onde, pel momentu, namás unos pocos títulos como Minecraft ufierten la posibilidá de xugar na nuesa llingua. Tiempu de Lleendes va ser el primer videoxuegu que nun ye que tea tornáu al asturianu, sinón que tien l’asturianu por única llingua.
Dexámosvos con un gameplay:
