El Principáu pon en marcha un plan d’ayudes a la creación lliteraria con un costu de cuarenta mil euros y de plazu abiertu hasta’l trés de febreru. L’envís ye sofitar la creación d’obres orixinales y afalar la vocación artística en cualesquiera de les llingües d’Asturies: castellanu, asturianu o eonaviegu. Estes ayudes, que van constar de trés mil euros por beneficiariu, son esclusivamente pa la creación de les obres, ensin facilitar con elles o esixir asoleyales. Pa preséntase a una de les dos llinies ye preciso tar dau d’alta como profesional del seutor cultural, a nenguna d’elles nun puen presentase obres presentaes a otros premios o convocatories, y les obres coleutives nun puen facese ente más de dos persones.
El xuráu que decida la concesión van formalu la persona titular de la direición xeneral de la Conseyería competente en materia de cultura (pudiendo delegar na vicepresidencia), la persona titular de la Direición Xeneral competente (o en quien esta delegue), una persona adscrita al serviciu d’Aición Cultural de la Conseyería, hasta trés persones adscrites a esta y hasta trés especialistes de prestixu. La manera d’eleición d’estes siete últimes persones nun s’aclaria nel BOPA.
Les modalidaes son:
-Narrativa (novela, novelina y llibru de rellatos): un mínimu de trenta mil pallabres.
-Poesía: un mínimu de quinientos versos.
-Teatro: un mínimu de venti mil pallabres.
-Cómic y novela gráfica: mínimu de cuarenta páxines.
-Ensayu, sobre un tema propiu del campu de les humanidaes: mínimu trenta mil pallabres.
-Lliteratura moza: mínimu de venti mil pallabres.
