La llibreria Cervantes, la más importante en volume de ventes n’Asturies, tien como obra lliteraria n’asturianu más vendida a lo llargo de 2022 la traducción de Xosé Lluis García Arias d’El Principín, la clásica obra d’Antoine de Saint-Exupéry tornada a más de quinientes llingües y, nesti casu, editada pola ALLA. Darréu, la obra más vendida ye 1809: Cartes de la Revolución de Trubia, escrita por Andrés Fernández con namás que diecisiete años y editada por Radagast. Esta obra de xéneru epistolar presenta un Asturies ucrónica que se dixebra históricamente de la real.
De siguío, les obres más vendíes en Cervantes son de non-narrativa:
La primera, la historia de la música asturiana que percuerre Xune Elipe n’Hai una llinia trazada, editada por Trabe. La segunda, la guía gastronómica de David Castañón Les Farturrutes: Caleyar y comer n’Asturies, editada por Delallama. Y la tercera, el llibru-CD Ente la niebla de Dixebra, que nuna coincidencia sorprendente empata en ventes coles trés siguientes obres de narrativa, que comparten el bronce nesti xéneru.
Estes son El fervinchu de Sidoro Villa Costales, ganadora del Premiu Xosefa Xovellanos, el controvertíu pastixe pulp La Rexenta contra Drácula, primer obra d’Adrián Carbayales, y Onde’l caos se texe y se destexe, la última novela de Xulio Viejo. Toes con exautamente’l mesmu númberu d’exemplares vendíos.
Nenguna obra de poesía algama esti top ventes, magar que n’asturianu ye, pelo menos nesti sieglu, un xéneru que se tien más cultivao que la novela.
Notes aclaratories: Nos datos facilitaos por Cervantes escluyéronse diccionarios y manuales didáuticos. Les obres infantiles viéndense polo xeneral na llibrería hermana y especializada nello, El Búho Lector.
