Cola vuelta a la normalidá tán volviendo, como yá dixéramos, delles convenciones que se facíen enantes n’Asturies. Nel mes d’ochobre foi’l Salón del Manga d’Asturies el que volvió dempués de tres años, un eventu, que magar que cambió delles veces d’organización, ye’l que más tiempu se lleva faciendo nesta provincia.
Como n’otros años, fízose nel Pabellón de La Magdalena d’Avilés, que dende la última vez tuvo delles reformes p’ameyorar el recintu. El Salón, que tamién tenía’l nome de Nikapon, tuvo ellí¡l 23 y 24 d’ochobre dende les 11:30 hasta les 20:30, col cierre de dellos puestos a la hora de comer.
Esti añu tuvieron como invitaos de cosplay Shiroychigo, Zananwars y SkullCaramel, tres cosplayers asturianos que dieron charres de fotografía, armadures y carauterización. Amás, Shiroychigo tamién dio una charra nomada “Llingua Asturiana, presente y futuru: cosplay, lliteratura y xuegos”, na que faló de tol conteníu que se ta faciendo venceyáu más alternativu nestes estayes.
Otru invitáu foi’l yá habitual Lord Migeru, que tien dellos llibros sobre videoxuegos y que presentó ellí¡Kame-Hame Ha! La Guía Definitiva y ¡Dame tu fuerza, Pegaso!.
Pa finar, y non menos importante, tamién tuvo como invitada la Elesky, música perconocida en Twitch y que ye miembru de Giants Gaming, un equipu de xugadores de E-sports de los más importante d’España. Dio un conciertu’l sábadu pela tarde nel qu’interpretó delles canciones d’anime y videoxuegos.
El Salón tuvo munches conferencies, talleres y actividaes, y tamién dellos concursos que son habituales nesta mena de celebraciones. Amás, dambos díes proyeutáronse cortos sobre Mitos y Lleendes de Xapón.
El sábadu fízose’l Concursu de Cosplay, qu’entemeció actuaciones con pasarela. Hubo más de 20 participantes, y el xuráu entregó tres menciones, consistentes en 3 prints y dellos vales pa gastar nes tiendes. Los ganadores foron: Shironekozz (cosplay: Kougyoku Ren), Pandebarra (cosplay: Bella de la Bella y la Bestia) y Mehren y Sukuluhum (cosplay: Howl y Sophie de El Castillo Ambulante). Hebo muncha xente mozo participante qu’amuesa qu’esti hobby tien relevu n’Asturies.
El domingu foi’l día del concursu de Cover Dance y del de Karaoke, dambos con categoría individual y grupal. La ganadora de concursu de Karaoke foi Amu Meow cola canción Alien de Iee Su Hyun y de coverdance Miri y Toni. Estos dos concursos tamién tuvieron una participación peralta.
Dientro de les charres, atopamos delles sobre Xapón, como una sobro’l “Programa MIRAI del gobiernu xaponés”, que da la oportunidá a un estudiante qu’inclui formación en llinia y un viaxe a Xapón con visites y dellos alderiques. Tamién hebo una charra sobre “Xapón y Occidente, rellaciones nel tiempu” y otra nomada “Xapón, un viax redondu” onde desplicaron cómo organizar el viax a Xapón perfeutu y dellos conseyos.
A la convención asistieron delles asociaciones, como Pequeñu Deseu, que cumple suaños de neños y neñes con enfermedaes con diagnósticu difícil, o la asociación XEGA, que llucha polos drechos y pola visibilidá del coleutivu LGTBIQ+.
Había delles tiendes comerciales con merchandising, pero esta convención punxo la mayor parte de los esfuercios y trayer artesanos, polo que podíes atopar ilustraciones, llaveros, ayalgues, feches a mano. Los visitantes nun duldaron en visitar toos esos puestos y sofitar a estos artistes, que llevaben más d’un añu ensin poner puestos n’eventos pol aciu de la coronavirus.
Y poco más nos queda por contar, más que convidavos a asistir a la edición del añu viniente y conocer el panorama alternativu de la mocedá asturiana.
