Por Andrés Fernández
Toos conocemos y adoramos con fondera y sincera devoción la obra del gran autor inglés John Ronald Reueld Tolkien y son incuntables les vegaes que mos perdimos nes fueyes de los sos llibros, recreándomos nel so mundiu fantásticu tan paecíu al nuesu pero al tiempu tan ayenu, un mundiu que quiximos creyer verdaderu demientres lu descubríemos neses melgueres tardes de branu o seronda nes que lleímos per primer vegada les noveles del caderalgu británicu. Pero ¿Y si los fechos que se narren yá seya en El Silmarillion o en El Señor de los Aniellos nun foren sinón la visión que d’ellos tenía l’escritor? ¿Y si consideramos a Tolkien, al qu’Ilúvatar guarde, como un simple cronista que cuntó una versión d’estos fechos que podría nun corresponder dafechu cola realidá? Kirill Eskov, escritor soviéticu, plantéganos esti escenariu na so obra, L’aniellu caberu, llibru d’obligada llectura pa tolos tolkiendili.
Los elfos son racistes, xenófobos y nun-y faen ascos al xenocidiu si ye menester pa esparder el so dominiu pela Tierra Media, Gondor y Rohan son dos vieyos y atrasaos reinos anclaos nel Antiguu Réxime, Aragorn ye un home cobiciosu y ensin escrúpulos dalos y Éomer, un llocu que namái val pa engarriase. Umbar ye una fascinante “Venecia napolitana” na que los espíes y les vendettes gobiernen sobro les canales; Harad nun ye equí alliáu del mal, sinón que se mos presenta como un sultanatu en crisis que tien d’enfrentase a Surania, un nuevu poder que surdió tres que’l so cabezaleru, Fasimba (una suerte de Mansa Musa tolkienianu) fuere a finar col dominiu del sultán y col comerciu d’esclavos negros gracies al sofitu de Mordor; que nun ye la tierra solombriega y escura que toos conocemos, sinón una moderna monarquía constitucional que s’empobina con pasu firme pa escontra la revolución industrial; un faru de modernidá y desenrollu, lo mesmo qu’Isengard. En fin y en resume, los orcos (que son homes corrientes) son los bonos del cuentu y non la raza malvada de El Señor de los Aniellos.
Pero cabe entrugase entoncies ¿Por qué Kirill Eskov tracamundia d’esti mou la sacrosanta obra de J.R.R Tolkien? ¿Por qué esta vuelta de tuerca al mundiu de la Tierra Media? Bien, la rempuesta ye enforma cenciella: Política.
Toos sabemos bien que Tolkien yera un agrarista llibertariu y tradicionalista que sentía un fonderu refugu pol industrializáu mundiu modernu, y eso pue vese mui bien na so obra. Les fuercies del “bien” son monarquíes medievalistes con economíes pre-industriales qu’han d’engarriase con tarrecibles poderes mecanicistes ya industriales. La rellación antagónica que se mos plantega na so producción nun ye otra que la de Ñatura escontra Industria, la de Tradición escontra Revolución ¿O nun ye El Condáu, una rexón agraria, descentralizada, con un estáu con atribuciones mínimes, la sociedá ideal pal caderalgu británicu?
Como ye de suponer, na Unión Soviética nun prestaron especialmente estes idees y allá foi Kirill Eskov a re-interpretar la obra de Tolkien pa facela más afayadiza pal xigante socialista. D’esti mou alcontramos un reinu, Mordor (y tamién a Isengard) patria del progresu, que contrasta dafechu colos atrasaos reinos d’occidente. Frente a les monarquíes absolutes alcontramos equí garantíes constitucionales y sistemes representativos; frente a la maxa y la superstición, la ciencia, el saber y la cultura. Por supuestu esti desenrollu, esta transición del Vieyu al Nuevu Réxime (que nun dexa de ser una analoxía de les revoluciones burgueses del sieglu XIX), desanicia o tresforma parte de la ñatura col so avance, tal y como pasó nel nuesu mundiu. Los orcos son los bonos, pero tamién foron culpables de que’l Gorgoroth camudare nun desiertu de sal y Saruman sigue alimentando los sos fornos cola madera de Fangorn; too tien un preciu a pagar, les ventayes y beneficios de la industria y del mundiu modernu nun son de baldre.
Asina, la llinia ente’l bien y el mal nun ta tan nidia como podría pensase nun entamu y la eterna entruga que mos vien a la tiesta a tolos que lleímos el llibru, si el fin xustifica los medios, déxase ensin rempuesta; abriendo puertes asina a una interpretación más suxetiva que seique nun atopamos na obra de J.R.R Tolkien, adoráu seya por siempres.
Too esto cúntasemos nuna escelente hestoria na que s’amiesten los espíes nes cais d’Umbar col viaxe aventureru de la nuesa pareya heroica, homólogos de Frodo y Sam; coles tensiones polítiques que surden dientro del propiu reinu de Gondor y tamién ente ésti y los elfos de Lórien como telón de fondu. Ensin dubia ésti ye un llibru que tolos tolkiendili habríen de lleer y del que puen salir munches y mui útiles reflexones. L’Aniellu caberu ye por méritos propios la pieza final del puzzleformáu pola producción lliteraria del autor británicu y nun merez l’escaezu al que foi condergáu.
