Yá dediqué dellos artículos al efeutu de la obra de don John Ronald Reuel Tolkien con anterioridá a esta ocasión, pero l’almiración y fonderu ciñu que profeso a la mesma llévame irremediablemente a posar les manes nel tecláu otra vegada más col envís de tresmiti-yos a vustedes, señores lleutores, una nueva perspeutiva sobro la producción lliteraria del caderalgu nomáu, perspeutiva que, siendo la personal que yo defiendo, yá dexé tresllucir n’otros de los mios artículos sobro Tolkien y qu’agora voi pasar a desllindar con detalle dende esti humilde ventanu nel internet.
Bien, creo nun tar erráu al suponer, y perdonen l’atrevimientu, que llegáu’l momentu d’enfrentase a la cenciella entruga de cuál ye’l llibru más relevante de tolos qu’escribió l’autor referíu la mayoría de vustedes, aventuro, afirmaríen con total seguridá que la novela más importante de toles qu’escribió J.R.R. Tolkien, al qu’Ilúvatar guarde, ye El Señor de los Aniellos; y en ciertu mou tendríen razón de ser esa la so conclusión. Vean, según yo veo les coses, y nun ye que tea diciendo que la mio opinión ye verbum dei (Eru quiera guardame de tal impropiedá), El Señor de los Aniellos ye la la guapa y imponente torre de la catedral tolkieniana, que se llevanta pa escontra’l cielu pa devoción de toos y a mayor gloria de la lliteratura. Pero toos sabemos qu’una torre, pa que nun caiga nin resquiebre y pa que puea alzase sobro la tierra, tien de tener unos bonos pegoyos con raigaños poderosos pa sostener el so pesu. Pue qu’esa base, esos pegoyos de dura y gruesa piedra, nun seyan nin los más sofisticaos nin los más guapos a la vista comparaos cola filigrana, cola finura y col esplendor del pináculu cimeru, pero ensin ellos esa mesma aguya que coronaba obra tan maxestuosa caería irremediablemente per tierra. Pues bien, eso ye El Silmarillion.
En El Señor de los Aniellos Tolkien lleva la so capacidá narrativa al so puntu de mayor guapura, concediéndonos una pieza cuasique ensin igual na que se recrea desendolcando’l mundiu que creyare ex novo, ufiertándonos decenes d’hestories que s’entrellacien les unes coles otres al rodiu d’un filu común, la hestoria de la compañía, que fai avanzar la hestoria con un ritmu sublime, suave cuando ha de ser suave y frenéticu cuando tien de selo. Pero tres esa novela que casique algama la perfeición escuéndese una obra mayor, seique menos refinada, pero igual de cautivadora. Tres cada capítulu de los que formen El Señor de los Anielloshai unos pegoyos fuertes que dan forma y ser a esi mundiu fantásticu tan fermosu. Y esos pegoyos son, ensin dubia y como yá adelanté, El Silmarillion.
Digo El Silmarillion, anque quiciabes tendría de nomar esa obra en plural, pues la presentación unificada de les sos partes ye una xera acometida pol fíu del escritor, Christopher Tolkien, yá fináu’l so pá. Pero seya como fore El Silmarillion y tolos volúmenes rellacionaos a él per vía de parentescu directu, como Les Balaes de Beleriand o El Llibru de los Cuentos Perdíos, nun son sinón la recopilación de toos esos rellatos y cuentos que l’escritor británicu foi escribiendo durante la so vida, cuentos y rellatos que son como los sillares que, xuntos, caltienen en pie la torre de la so producción lliteraria, como yá referí enantes.
El Silmarillion ye la esencia mesma de la Tierra Media, atopamos nél tola so hestoria mitolóxica, dende’l so orixe primixeniu hasta los fechos que se rellaten en El Hobbit y en El Señor de los Aniellos y, consecuentemente, atopamos tamién la desplicación de por qué la Tierra Media ye la que ye. Ensin El Silmarillion fáese llabor imposiblecomprender dafechu’l mundiu de Tolkien, nin tampoco a los sos personaxes. El por qué del odiu de los nanos pa colos elfos, la desplicación de l’adoración que profesen los elfos a la estrella Eärendil (y la so verdadera natura), la trescendencia verdadera de la rellación ente Aragon y Arwen… Y a estes incógnites que resuelve El Silmarillion hai qu’amestar entovía un llargu etcétera.
Si nun consideren vds. que ta fuera de llugar voi permitime concluyir con rotundidá que El Silmarillion, o más bien los rellatos que lu componen, ye, como afirmo nel títulu, una obra pivotal que cualesquier tolkiendili que se precie de tal debería tener na so estantería. Ye cierto qu’esos mesmos cuentos nun tan remataos, porque Tolkien nun pudo finar esa obra magna en vida, nin tampoco esiste un filu conductor como en El Señor de los Aniellos, polo que’l ritmu del llibru metamorfosea y ye nunes partes veloz y n’otres lentu como’l pasu d’un güe, amén de que, ensin qu’esto sinifique ofiensa al so trabayu, les partes añadíes por Christopher Tolkien carecen de la finura de la pluma paterna. Pero esos rellatos, esos rellatos enllenos d’emoción y de sentimientu humanu que formen El Silmarillion, nun tienen preciu.
Afálovos a toos vds. señores lleutores a invadir les biblioteques pa desenterrar exemplares de El Silmarillion, Les Balaes de Beleriand, El Llibru de los Cuentos Perdíos, etc. y pa conmovese énte les estremaes versiones de les mesmes hestories, caúna llixeramente distinta na forma pero idéntinca na esencia, caúna verdaderamente maxestuosa. Afálovos a llorar coles hestories de Túrin Turambar, al que nun cansaré de mentar o de Beren y Lúthien, a sentir l’amargor de la mísera suerte de Fëanor y los sos hermanos, a ablucar énte la imaxe preciosa de Telperion y Laurelin, rellumando fermosos, o de Tirion, Gondolin, Nargothrond, Tol Sirion o los bosques de Doriath.
Eso ye El Silmarillion. Ye un torbellín delirante d’emociones y de sentimientu, un sentimientu, como yá dixi, fonderamente humanu pero que tamién tien dalgo de divín, dalgo máxicu. Si El Señor de los Aniellos ye una torre de catedral, El Silmarillion ye como la paré d’un cantil nuna costa xabaz, una catedral natural ensin modificar pola mano del home, na que les naves son cueves llabraes pol agua y los arbotantes, estribos y contrafuertes los arcos de piedra duro que reciben cada día la fuercia del mar, un mar que bien podría ser el gran Belegaer, si me perdonen la redundancia, énte’l que Tolkien fai que mos estremezamos tantes y tantes vegaes, al traviés de los güeyos de Tuor, Eärendil, Idril y tantos otros.
