Llevamos un tiempu dándovos cuenta de lo qu’asocede cola fuelga de guionistes de Hollywood, pos según va allargándose empiecen a tremer más y más les grandes productores. La fuelga de 2007-2008 produxo unos estragos tremendos, con grandes retrasos y series de lo más populares que nun consiguieron llevantar cabeza depués. Foi, guapamente, más grave pa la industria que los efeutos del Covid.
Nel trescursu de les protestes, quiciabes pa llamar l’atención sobre estes, son yá más d’ún los manifestantes qu’apunten a unes declaraciones que Jenna Ortega fizo va unos meses, y que dende’l gremiu se consideren un ataque a la profesión. ¿Cuáles?, ¿qué ye lo que pasó?
El casu ye que, en marzu, Jenna Ortega contó nuna entrevista que nun tuvo problema en pasa-yos per debaxo la pata a los guionistes de Wednesday, la serie na que ta dando vida a la fía de la siniestra familia Addams, pero agora dándo-y un xiru a hestories de detective xuvenil con elementos sobrenaturales. Según ella, los guionistes escribíen coses que nun teníen sentíu pal personaxe, y nun tuvo problema en cambiar (ensin avisar a naide) les llinies del guión nel mesmu momentu nel que taben grabando. Hubo delles ocasiones nes que’l supervisor del guión tenía de llevala a un aparte y pregunta-y qué demuérganos yera lo que taba faciendo, a lo qu’ella respondía que’l personaxe nun diría lo que-y mandaben dicir. Nun yeren pocos los cambios: pa so idea, de mano, el guión habría ser munchu más escuru; llueu, el triángulu amorosu con otru estudiante de l’Academia Nevermore y el fíu del xérif nun tenía pa ella nengún sentíu, y tamién punxo otros exemplos como que se ñegó en redondu a dicir un “encántame” cuando Wednesday se ve col vistíu que lleva al baille, porque “ella nunca nun diría eso”. La mesma actriz apuntó a que nun se comportara de manera profesional.
Ye por ello qu’agora los guionistes ven nella un recursu qu’esplotar nes protestes nes que traten d’emponderar el so trabayu, reclamar el valor que tienen y, como vos contemos va poco (podéis velo calncando equí), nun acabar sustituyíos por testos xeneraos por intelixencies artificiales. Y, asina, podemos ver nes manifestaciones carteles tan simpáticos como esti, anque pueque a ella nun-y faigan tanta gracia.
(Diz dalgo asina como: “Ensin escritores, Jenna Ortega nun va tener nada que cargase”.)
