Va años qu’en Xapón hai un problema importante con persones que deciden aislase dafechu del mundu. Acubilen en cuartu, davezu pa tar tol día xugando a videoxuegos, y llega un momentu nel qu’hasta tienen de llevales la comida a la puerta porque nun son a salir fuera. Va yá años que se superó la cifra de mediu millón de hikikomori en Xapón, y ye un fenómenu qu’adulces va espardiéndose pel mundu. Conócense casos n’España, que van aumentando col pasu los años y sobre manera asocedió a parti del estáu d’alarma.
El casu ye que l’otru día se fizo viral un filu del siquiatra Wada Hideki, nel qu’apunta a que’l síndrome yá afecta a xente de toles edas. Per un llau, esto asocede denda va tantu tiempu (empezó a estudiase’l problema nos años noventa) que dalgunos hikikomori que los son d’amunchayá anden yá pelos cincuenta años (dependiendo de padres d’ochenta, lo que se conoz como’l “problema 8050”, o inclusive ensin persones que los ayuden), y per otru agora hailos tamién que s’aislen de la sociedá cuando se xubilen, pos nun alcuentren sentíu al salir de casa. Esti siquiatra apunta, de fechu, a qu’anguaño’l problema ye más seriu a partir de los cuarenta años.
Dalgunos de los síntomes que puen indicar qu’una persona sufre’l síndrome del aislamientu social son el retiru nel llar, l’absentismu y la falta de cumplimientu de deberes, la inversión del sueñu (dormir de día), regresión (comportamientos propios d’una edá menor), adicción a los videoxuegos, comportamientos obsesivo-compulsivos, depresión y pensamientos suicides, episodios violentos o trestornos alimentarios.
