El creador de The Squid’s Game, l’ésitu recién de Netflix y que yá ye la serie coreana más vista de la canal, nun escuende basase en Battle Royale. Esta novela xaponesa, que nun tardaron n’adautar a película y manga, foi l’entamu de tou un soxéneru d’horror, davezu denomáu “de sobrevivencia”, y hasta d’ún de videoxuegos, direutamente nomao “battle royale”. El llibru en cuestión preséntanos una ucronía na que Xapón ganó la Segunda Guerra Mundial (o eso afirma la historia oficial) y que tien, como una especie de tradición, secuestrar clases enteres de rapazos y facelos enfrentase ente sí hasta que namás que queda ún. Y anque pue paecer una sida mala pa una historia d’horror y matancies, y nes películes y el manga el restu queda un poco pa prau, la obra contién cierta crítica al falar de que, quiciabes, una idea tan esparatada como esa se-y ocurrió una vegada a un altu mandu del exércitu con dalgún envís y, por nun lu contradicir, sigue faciéndose endagora.
Bien, pos sobre The Squid’s Game podemos dicir, ensin mieu a equivocanos, qu’el conteníu críticu y la carnicería sí anden bien equilibraos. La ficción coreana ye menos de calcar na violencia y el sexu que la xaponesa, y el puntu de partida tien los pies bultablemente más en suelu: Una organización atraye, con promeses de premios bien arrogantes, a xente afogao poles deudes y a lo que yá-y queda poco que perder. En descubriendo que la eliminación nos xuegos de ñeños que-yos proponen supón la muerte, y tamién lo bárbaro del premiu que pue consiguir el ganador, los concursantes han decidir si quieren más quedar o enfrentase de nueves a la vida de penuries que llevaben.
D’esta miente, y ensin dexar de llau que de xuru que quien s’acerque a la serie lo fai, lo menos un poco, por gociar de pura diversión sangronienta, pon sobre la mesa temes como la desigualdá social, la competitividá y cómo’l sistema fai que nos engarriemos ente nós mientres los d’enriba miren. Y, poques gracies, fainos preguntanos qué fadríemos nós en casu d’alluganos na mesma situación que los probes concursantes. ¿Ayudaríes al vieyu porque nun ye a valese por sí mesmo, o pueque lu emburriares p’alantre pa quien muerra seya él y non tu? Ye fácil dicir qué ta bien y qué mal cuando tas sentáu en sofá.
Si tengo de criticar dalgo de la serie que nun-y perdono, eso ye ensin duda la estética a lo La casa de papel, de la que bien podríen caltener la fuercia cromática, ensin paecer un calcu descaráu, de cambiar los monos coloraos de los guardies por otros más arrosaos (arriendes de que, pa mio idea, ello los fadría rescamplar más sobre los verdes mostios de la ropa los demás, y casaría más colo absurdo que ye apostar la vida a coses como l’esconderite inglés). Coime, que’l mayor problema d’una serie seya la eleición de colores yá diz muncho al so favor.
En resultancia, una serie mui entretenida si tienes coraes pa ella, que nun inventa nada pero que lo fai too curioso, y que tien enforma más fondu qu’a cencielles ufrir una exhibición de sangre y muertes. Dicen que yá la anovaron pa una segunda temporada, y personalmente espero que dure unes cuantes más.
Que placer leer en Bable (astur si se prefiere).
A mi me ha parecido entretenida, con un guion acido y una historia que no permite ser previsible aunque las referencias a Battle Royale, Gantz, los Juegos del Hambre o incluso The Runninman son inevitables.