El valencianu Miguel Bernardeau (Élite, 1899, Ola de crímenes) foi l’actor escoyíu pa ser el próximu Zorro, l’espaderu más famosu de California. Nuna serie nueva qu’Amazon encargó a Secuoya Studios pa la so canal de streaming, el cruzáu amazcaráu va volver “con un enfoque modernu y global que va conquistar a les xeneraciones nueves”. Sicasí, y por muncha actualización que faigan, les informaciones indiquen que va siguir ensin cambios demasiao significativos, pos esto nun va alteriar que tea ambientada na primer metá del sieglu XIX, cuando California pertenecía a México.
La serie, considerada polos estudios una gran apuesta de la canal, grabóse nes Isles Canaries con un repartu a paches ente actores españoles y mexicanos, y Secuoya anuncia que la tienen yá en procesu de posproducción. Por embargu, paez qu’esti va ser llargu, y espérase que la so estrena nun seya hasta mediaos de 2024.
El Zorro, creáu en 1919 pol autor de relatos pulp Johnston McCulley, convirtióse pronto nún de los héroes más nomaos del mundu. L’autor escribió más de sesenta hestories sobre el personaxe, sacaron como cincuenta películes y unos cuantos seriales basaos nél (dalgunos mui llibremente, como la película aquella que lu enfrenta a los Tres Mosqueteros, o la serie d’animación de 2006, protagonizada por un descendiente que va en moto y enarbolia una espada láser). Y, de la mesma manera, abondos autores siguieron años depués colos sos relatos, tanto en novela (como foi’l casu de la reinterpretación d’Isabel Allende, El Zorro: Comienza la leyenda) como en cómic (mediu onde s’enfrentó a Drácula o a Django).
Yá salió una imaxe de la próxima serie pa crear hype (y que vos dexamos darréu), pero qu’enseña lo xusto pa siguir creándolu los próximos meses.
