Yá van nada menos que cinco años desque Bethesda anunció l’esperadísimu The Elder Scrolls VI, pero dende entós cuasi nun tenemos noticia dala. Y ye qu’estos estudios (tamién responsables de sagues como Fallout, Quake o Wolfenstein) tienen por vezu trabayar nun solu xuegu, ensin enguedeyase en dellos proyeutos al empar pa que nun afeute al resultáu final. Y como’l tamién esperáu Starfield, RPG de temática espacial nel que taben trabayando, sal yá la selmana viniente, puen centrase por fin nel clásicu de fantasía épica.
Asina, nuna entrevista qu’acaba de face-y la páxina española Vandal al direutor de Bethesda, Peter Heines, sobre manera tocántenes a los detalles de Starfield (y que vos dexamos calcando equí), l’executivu anuncia qu’Elder Scrolls VI tien pasao yá la fase de preproducción, y l’equipu ta metíu yá en tol megoyu. Anque l’avance, hasta agora, ye pequeñu, y nun tenemos tovía imáxenes promocionales o fecha d’estrena. Pero nun nos fixemos no malo, que pasáu mañana sal Starfield y promete non decenes, sinón cientos d’hores de diversión.
Elder Scrolls ye una de les sagues de xuegos de rol más valoraes del mundu, coles trés últimes entregues premiaes polos Game Awards. Nació amunchayá, en 1994, y conozse sobre manera pola llibertá que da al jugador pa tomar decisiones y lo estenso del mundu abiertu pel que se pue viaxar.
