Tres de salir unes cuantes vegaes nel Universu Cinematográficu Marvel, por fin dieron a la Bruxa Escarlata, personaxe interpretáu por Elizabeth Olsen, el protagonismu qu’ameritaba con una serie propia en Disney +, WandaVision. La serie tuvo mui bones crítiques, y aficionaos a esgaya celebraron l’arcu dramáticu del personaxe, nel que se volvía villana y depués se rimía. Ye por ello que tamién hubo delles quexes cuando la volvieron de nueves villana, la enemiga del Fechiceru Supremu, en Doctor Strange in the Multiverse of Madness, yá que munchos consideraron que taben faciendo daqué repetitivo col personaxe. Nin siquiera la sida de que’l Darkhold (el Necronomicón de Marvel) taba afeutándola sirvió p’aselar esta crítica.
El casu ye que, n’abril (podéis ver la entrevista calcando equí), Olsen comentó que quedara ablucada cuándo-y dixeron, yá tando pa grabar la película, que diba ser la villana, pos yera dalgo que nun-y casaba col desendolcu del personaxe. Naide nun-y lo dixera enantes. Pero agora sabemos que nun foi solo eso, sinón que resulta que la cosa ye bastante más grave.
Va unos díes, nuna entrevista a Vanity Fair (que tamién podéis ver calcando equí) tamién cuenta que, pola mor d’esi ablucamientu, y pa ver si-y esplicaben qué asocedía, foi ver a los guionistes de la película y preguntó-yos si ellos vieren WandaVision, yá que l’arcu narrativu de la película yera demasiao asemeyáu. La respuesta foi que non. “Conque tuvi d’intentar… nun sé, interpretalo d’otra manera”, confiesa, “abordalo dende otru puntu de vista pa que nun fuera repetitivo”.
Nun universu compartíu, nos que trabayen tantes persones en tantos proyeutos al empar, el llabor de coordinación ye bien importante, y de fechu Marvel tien exemplos históricos de cometer errores paecíos nos cómics y yá habría tenelo deprendío. Por embargu, equí evidénciase una falta de comunicación importante ente los creadores involucraos nes “fases” del Universu Cinematográficu, con chambonaes que depués acostacien los actores y tienen de resolver como puean.
