La saga de llibros de Percy Jackson, iniciada en 2005 pol escritor Rick Riordan y que consta de seis entregues, traducíes a trenta idiomes, tuvo nel so momentu la oportunidá de ser un ésitu multimedia al altor de Harry Potter. Por embargu, tomaron decisiones pa facer les películes que nun paez que fueren les meyores p’adautala. Les crítiques nun fueron bones, la recaldación pudo ser meyor, y nun pasaron d’una continuación.
Por embargu, va un tiempu que los fans de les noveles ponen les ilusiones en Disney, pos poco depués de qu’esta comprara Fox, la productora que tenía los drechos, anunció que tenía en fornu una adautación nueva, escomenzando pol principiu pa nun arrastrar errores del pasáu.
Pos bien, esa adautación, en formatu de serie pa echar en streaming, llega yá pa estes navidaes (estrénenla’l venti d’avientu), y pa dir poniéndonos los dientes llargos úfrennos un avance que nun pinta nada mal (dexámosvoslu calcando equí). D’esta manera, la idea ye que Percy Jackson and the Olympians, que ye como se titula p’abarcar l’argumentu de tolos llibros, adaute ún pa cada temporada, y asina completar tola saga en seis años. Esta primer temporada consta d’ocho episodios, lo que va facilitar l’adautación ensin comprimir l’argumentu como se vieron obligaos na película.
¿Munches ganes? Lo principal, lo que los fans piden, ye que por fin-y faigan xusticia.
