L’ésitu indiscutible de Super Mario Bros. en cines, mui cerca d’algamar el primer puestu ente les películes más esitoses del añu, promete que van venir un cientu más d’obres basaes en videoxuegos. Talamente como, per otru llau, que Barbie seya la ganadora de la medaya d’oru va facer que salgan un cientu de películes más basaes en xuguetes.
Asina, y como nun podía ser d’otra manera, Nintendo yá tien en marcha otros proyectos. El primeru qu’anuncia, y que la noticia va prestar a xente de cuasi toles xeneraciones, ye que ta en camín una película de The Legend of Zelda, la mítica saga de xuegos de fantasía. Nesta ocasión, una película d’acción real, y non d’animación como la de Mario. Eso sí, tovía queda pa que la película s’estrene, probablemente va haber qu’esperar a 2026, pos tovía nun tienen siquiera anunciáu l’elencu, y amás esa fecha coincidiría col cuarentenu aniversariu de la saga.
Anque, tamién ye verdá, igual tamos falando de Zelda como si tol mundu supiera qué ye y resulta qu’hai dalgún de los nuesos llectores que nun tien idea. En 1986 estrenóse’l primer videoxuegu de la saga pa NES, y dende aquella tienen sacao más de trenta. Lo más común nellos, protagonizaos por Link, un mozu d’oreyes élfiques, ye que tengamos d’embarcanos nuna aventura y emplegar la “Trifuercia” (sabiduría, poder y valor) pa salvar a la princesa Zelda y acabar col malváu Ganondorf. Asina dicho, resumiéndolo nuna llinia, pue sonar como otros milenta xuegos, pero l’ambientación y la estética que se tienen ellaborao a lo llargo de les entregues faen del so mundu un llugar únicu.
Yá tienen salío cómics, llibros y una serie d’animación de mui pocu duramientu, pero esta va ser la primer vegada que vamos ver a Link y Zelda en carne y güesu. Yá hai xente faciendo cábales sobre los posibles actores, pero de momentu son solo especulaciones.
