Nun ye porque coincida cola polémica saltada ayeri, pero nun dexa de ser llamadero que seya nesta cuando sal la noticia. Va yá tiempu que sabemos qu’anda tresnándose una continuación de la serie Handmaid’s Tale, basada na novela que fai de segunda parte de la orixinal, y que va contar col mesmu creador y showrunner (Bruce Miller) al mandu. El casu ye, agora, que como se punxeron a ello al empar que tán cola última temporada que la serie orixinal, esta va perder la direición de Miller porque quier dar prioridá a The Testaments. Asina, la final de The Handmaid’s Tale va contar, pela so parte, con namás qu’el guión d’un par de capítulos, mientres que van tomar el timón los coproductores y guionistes Eric Tuchman y Yahlin Chang.
Tocántenes la serie nueva, ¿qué sabemos d’ella? Pos que, como dicíemos, ta basada na novela de la mesma autora, Margaret Atwood, y qu’asocede quince años dempués que la orixinal, cuando’l personaxe que yá conocemos, Tía Lydia, yá desengañada, escribe una autobiografía na que narra, ente otres coses, cómo llegó a ser “tía”. Atwood escribió la novela en coordinación colos productores de la serie, yá qu’esta va más alantre d’ande llegó la primer novela.
The Handmaid’s Tale son una novela y una serie distópiques de corte feminista, presentando un mundu nes que les más de les muyeres son estériles y, nun réxime perrelixosu, les clases altes usen les fértiles como madres de los sos fíos, forciándoles de manera ritual y dempués simulando que son les ames les que dan a lluz mientres lo faen elles. Les analoxíes cola xestación sorrogada faense mui evidentes.
