La popular Stranger Things, la que ye la serie n’inglés más vista en Netflix, va llegar pronto a la fin cola quinta temporada, que s’espera pa 2024. Pero l’ésitu que tien fai que la canal vea nella una posible franquicia, y yá lleven un tiempu planiando cómo siguir contando hestories nel mesmu universu p’aprovechar el tirón. Una d’elles, con tola probabilidá la primera que va salir, pos yá ta confirmao que tán trabayando nella, ye una serie d’animación, tovía ensin nome y de la que, la verdá, nun sabemos muncho tanina; bono… la verdá qu’unes cuantes coses sí sabemos:
Una, que la producen los mesmos creadores de la serie madre, los hermanos Duffer; otra, que l’estudiu d’animación al cargu ye l’australianu Flyin Bark, el mesmu que’l de la serie de Marvel What If…?; tamién que nun va tar protagonizada polos mesmos personaxes de la serie, sinón que va presentar otros; y arriendes de too ello, que los Duffer quieren basase “nos dibuxos de los sábados pela mañana” que tanto-yos prestaben de guaḥes, como He-Man and The Masters of the Universe. Esto último piega abondo cola temática de la serie, yá que si esta imita les películes clásiques de los ochenta, tien tol sentíu del mundu que los dibuxos ataquen tamién a la señardá del espectador.
La serie Stranger Things ye dende 2016 ún de los “buques insignia” de Netflix, sinón el que más, una serie que mez ciencia-ficción, horror y aventures xuveniles nun homenaxe continuu a la cultura de los años ochenta, pudiendo vese nella referencies clares a The Goonies, E.T., Poltergeist, Firestarter, Nightmare on Elm Street, It o Hellraiser, asina como a otros productos culturalesde la década, como la música o l’ésitu de los xuegos de rol. En 2019 rompió récores d’audiencia con cuarenta millones d’usuarios viéndola.
