Nun va tanto desque se dicía que les adautaciones de videoxuegos tabe condergaes al fracasu. Los intentos nos años noventa ye meyor olvidalos, y nes dos décades siguientes tamién hai coses que nun son pa enmarcar. Por embargu, l’ésitu recién de Sonic y Mario nos cines, y el de The Last of Us en televisión, paecen tar anunciando que ye’l momentu de les películes y series basaes nellos. Tamién ye verdá qu’otres obres de los últimos años (¿daquién dixo Mortal Kombat?) son pelo menos ameyorables, pero cualesquier cosa pue ser más prestosa que lo que tien salío en pasáu.
Al respeutive de Street Fighter, yá salió una película d’aición real nos años noventa, con Jean-Claude van Damme faciendo de Guile, el protagonista nesa ocasión (suponemos que por aquello de ser norteamericanu) y Raúl Juliá de Bison, el supervillanu. Hai bastante consensu en que foi una película espantosa. En 2009 volvieron a intentalo con Street Fighter: The Legend of Chun-Li, na que Kristin Kreuk, famosa por Smallville, nun consiguió dexar el llistón más altu (pa detrás de que la fidelidá al videoxuegu yera como poco discutible).
Agora, por embargu, paez surdir una oportunidá nueva pa la franquicia, y Legendary (la productora del Monsterverse, Dune y Jurassic World) quier apostar fuerte por ella, y como anuncia The Hollywood Reporter (nesta noticia) yá fichó a los direutores Michael y Danny Phillipou (Talk to Me) pa encargase d’ella. De xuru que tais naguando por saber el repartu, pero tovía nun tenemos noticies sobre ello.
Street Fighter ye una franquicia de videoxuegos nacida en 1987, pero que se fizo mundialmente famosa cola segunda parte estrenada en 1991, na qu’apaecen lluchadores de munchos países distintos y ente los que s’inclúi ún español, Vega (Balrog en Xapón), creador d’un estilu de llucha qu’entemez ninjutsu, savate, zipota, toréu y sardanes. Amás de les películes yá mentaes, tamién les hai d’animación, asina como cómics. Ye quiciabes el videoxuegu de llucha más famosu, y marcó estos pa siempre.
