Va tiempu que se falaba de la posibilidá, pero agora Lionsgate yá confirma que se fizo colos drechos p’adautar al cine los famosos videoxuegos. Derek Kolstad (creador de John Wick) va trabayar a la xunta de Toru Nakahara (productor de Sonic) pa llevar a aición real la saga de Sega que, de tener ésitu, de xuru que va dar pa una bona riestra de películes.
Streets of Rage foi nun orixe, ente 1991 y 1994, una triloxía de videoxuegos de Mega Drive del xéneru beat’em up, esto ye, de dir pela cai arreventando la cara a tola gandaya que se te crucia, masque se convirtió en tetraloxía apocayá, cola vuelta del títulu en 2020. Nellos has manexar una serie de personaxes, davezu policíes (¡ún un canguru!) que nun mundu pernoventeru y con un aire cyberpunk propónense salvar el barriu de la banda d’un mafiosu nomáu Mister X.
