Como yá vos tenemos contao n’otres noticies, la fuelga de guionistes ta poniendo tou Hollywood pates p’arriba, talamente como fizo la de 2007-08. Tanto, de fechu, que tán pensando en sustituyir a estos trabayadores por intelixencies artificiales que faigan la so xera (cosa de la que falemos equí) cola esperanza de que, cuando la fuelga acabe, los guionistes namás tengan de retocar los guiones prexeneraos que yá tendrán llistos.
El casu ye que los estudios Marvel tampoco nun se salven d’esta catástrofe, y les sos fases tan programaes, y anunciaes con tantu bombu y antelación, empiecen a cayer pa nun sabese cuando van volver a la normalidá. Asina, de la mesma manera que va trés selmanes (equí) vos contábemos que cayía, hasta nueva orde, la versión nueva de Blade (el cazavampiros más conocíu de la editorial y al que yá tien interpretao Wesley Snipes) adulces van quedando en llimbu otros proyeutos, como la película de los Thunderbolts (nun principiu anunciada pa xunetu de 2024) y les series de Wonder Man (pa finales d’esti añu) y Daredevil: Born Again (pa finales del viniente).
Esti problema amiéstase a otros pelos que ta pasando la propiedá de Disney, como un recaldamientu modestu d’Ant-Man and the Wasp: Quantumania y les denuncies por malos tratos que nun paren de llover sobre Jonathan Majors, l’actor que fizo de villanu nesta y que, hasta agora, taba destináu a ser el próximu gran villanu del Universu Cinematográficu Marvel.
Por suerte pa los estudios y los aficionaos, otres películes que tan cerca d’estrenase como The Marvels, Deadpool 3 o Captain America: New World Order paecen siguir alantre ensin torgues.
